ХИФУ 9/2 №-дээх уопсайыгар харантыын биллэрилиннэ. Манна олорбут устудьуон хоруона вируһунан ыалдьыбыта билиннэ. Кинини кытта “контактаспыт” 300 тахса киһини быраастар хонтуруолга ыллылар. Бу туһунан “Instagram” социальнай ситимҥэ университет официальнай сирэйигэр иһитиннэрэллэр.
Санатар буоллахха, үөрэх кыһалара кулун тутар 17 күнүттэн дистанционнай үөрэххэ көспүттэрэ. Уопсайга олорор устудьуоннары дьиэлэригэр ыыппыттара.
ХИФУ иһитиннэрбитинэн, кулун тутар 20 күнүттэн уопсайдарга туора дьон киирэрэ бобуллубут. Атын дойдулартан кэлбит устудьуоннара булгуччу медосмотр бараллар уонна икки нэдиэлэ харантыыҥҥа олороллор. Ону таһынан, профессордар, научнай үлэһиттэр кэлэллэрин тохтоппуттар. Университекка “онлайн” үөрэх ыам ыйын 17 күнүгэр диэри уһаабыт.
“9/2 №-дээх уопсайга харантыын биллэрилиннэ. Ол төрүөтүнэн биир устудьуон COVID-19 ыалдьыбыта буолар. Онон сибээстээн бу уопсайга олорор 319 устудьуон хоруона вируһугар анаалыс туттарыахтара. Ону таһынан, икки нэдиэлэ устата быраастар кэтэбиллэригэр сылдьыахтара. Үөрэхтэрин “онлайн” быһыытынан салҕыахтара”, – диэн ХИФУ-га иһитиннэрэллэр.
Билигин уопсайга санация ыытыллар, устудьуоннар хосторуттан тахсаллара бобуллубут. Университет харантыын кэмигэр устудьуоннары аһынан уонна мэдиссиинэ тэрилинэн хааччыйар.
“Бу дьаҥ устудьуоннар олорор уопсайыгар тиийбититтэн олус дьиксиннибит. Билиҥҥи туругунан биир оҕо ыалдьыбыта биллэр. Билигин кини чугастык алтыспыт дьонун быһаараллар. Университет устудьуоннарга күүс-көмө буолуоҕа”, – диэн ХИФУ ректорын Анатолий Николаев эппитин тиэрдэллэр.
