Бөлүүн түүн Тулагы бөһүөлэгин утары фарватер таһыгар баар арыыга хаайтарбыт 11 булчуту быыһаатылар. Ол туһунан бөһүөлэк баһылыга Егор Попов “Дьокуускай” Telegram-ханаалга маннык иһитиннэрэр:
“Түүн биһиэхэ куораттан кэлбит 11 булчут арыыга хаайтарбытын туһунан эрийэн эппиттэрэ. Биһиги Быыһыыр сулууспа үлэһиттэрин ыҥырбыппыт. Кинилэр булчуттары олус өр көрдөөн булбуттара. Ол кэмҥэ булчуттар итирик туруктаах сылдьыбыттар. Массыыналарын хопуотугар диэри уу ылан, массыыналарын үрдүгэр тахсан турбуттар. Түөрт киһини тута мотуорканан таһаарбыттар. Атыттар итирик туруктаах буоланнар бырааптарын “хачайдаан” барбыттар. Инньэ гынан, Росгвардия үлэһиттэрин ыҥырбыттар”, – диэн баһылык иһитиннэрбит.
Кини бэйэтэ эрэһиинэ тыытынан үс киһини таһаарбыт. Олохтоохтор эмиэ бу арыыга бултууллар эбит. Ол эрэн, массыынанан буолбакка, тыынан сылдьаллар.
Бөлүүн түүн дьаһалта үлэһиттэрэ бары түүҥҥү дьуһуурустубаҕа олорбуттар. Ол кэмҥэ булчуттары быыһаабыттар. Түүн уу ылбыт сирдэриттэн дьону уонна сүөһүнү таһаарбыттар.
