Мииринэй куората биир кэм эриэ-дэхси, тупсаҕай буолбатах.
Үчүгэй көрүүлээх-истиилээх дьиэлэри сэргэ бөрүкүтэ суох туруктаахтар эмиэ бааллар. Дьиэ туруга олохтоохтортон эмиэ быһаччы тутулуктаах. Уон биэс сыл тухары куорат бу таас дьиэтин эҥкилэ суох тутан кэлии холобурун кытары билиһиннэриим.
Бу сырыыга куорат олохтоохторугар дьиҥ-чахчы холобур буолар, Өктөөп 40 сылын аатынан уулусса 6/1 «Наш дом» ТСЖ дьиэтин көрдөрүөхпүн баҕарабын. 72 кыбартыыралаах монолит-каркаас дьиэ 2005 сыллаахха тутуллубута. Ол бэйэтэ хайдах тутуллубутунан, син-биир саҥа дьиэ курдук көрүҥнээх турар. Дьиэни “АЛРОСА” тутуутун тиһигэ - УКС өссө күүстээх эрдэҕинэ, Мииринэйдээҕи тутар-таҥар трест №5-дээх тутар управлениета уонна «Веста» фирма дьэндэппиттэрэ.Онон хааччыстыбата билиҥҥи дьиэлэрдээҕэр быдан ордук диэххэ наада.
Бастатан туран, дьиэ ураты ыраас. Тулааһына, хас да төгүл бөҕөргөтүүлээх. Уу-хаар “күүлэйдээбэтин” туһуттан аналлаах халдьыалардаах. Дьиэ уон биэс сыл турда да, ханан да тэстии, көөрөттүү суох. Иннэ - тилэри бетон-аспаал. Олбуорга туора массыыналар киирбэттэр. Дьиэ тулатыгар туох буола турарын видео-кэтээһин кыраҕытык көрөр.
Уот ааныттан подъезтарга киирэргэ – булгуччулаах домофон. Сантехника – сүүс бырыһыан бастыҥ хааччыстыбалаах полимер турбалар. Хас биирдии кыбартыыра, итии-тымныы ууну мээрэйдиир, учуотчут тэриллээхтэр. Уот учуотчуктара - саамай аныгылар.Дьиэ хаабыл интернеттээх, wi-fi уруккуттан баар.
Бу дьиэ, лоп курдук, 12 сыл анараа өттүгэр, кыбартыыралар хаһаайыттарын табаарыстыбата – нууччалыыта «Товарищество собственников жилья» буолбута.
Маны иилээбит-саҕалаабыт киһинэн саха кыыһа — Анна Юрьевна Иванова буолбута.
Мин билэрбинэн, кини геологияҕа научнай үлэнэн дьарыктанар идэлээх.
ТСЖ буоланнар, ууну уонна сылааһы биэрэр тэрилтэни кытары быһа сөбүлэҥнээхтэр. Кыбартыыра иһин төлөбүр атын дьиэлэрдээҕэр чэпчэки. Дьэ, ол иһин, бу дьиэ олорорго саамай тупсаҕайбыһыылааҕынан ааҕыллар. Кырдьыга да оннук.
Станислав Алексеев. Мииринэй куората. Ааптар хаартыскалара.
