Дьокуускай куорат уһуйааннара балаҕан ыйын 1 күнүттэн бары ирдэнэр саньытаарынай ирдэбиллэри тутуһан үлэлэрин саҕалыахтара. Бу туһунан куораттааҕы үөрэх управлениета иһитиннэрэр.
Уһуйааннар арыллыахтарын иннинэ дезинфекциялыыр маллары туһанан сууйуу-сотуу, ону тэҥэ вентиляцияны уонна салгын киирэр систиэмэлэрин ыраастааһын уонна дезинфекциялааһын күүскэ ыытыллыаҕа.
Күн ахсын сарсыарда медиктэр оҕолору көрүөхтэрэ, булгуччулаах термометрия ыытыллыаҕа. Хас биирдии бөлөҕү тус-туһынан, кинилэргэ сыһыарыллыбыт ааннарынан киллэрии тэриллиэҕэ.Төрөппүттэр мааската, бэрчээккитэ суох оҕо уһуйааныгар киириилэрэ бобуллар.
Үөрэх хаамыыта хас биирдии бөлөххө сыһыарыллыбыт эрэ хоско ыытыллыаҕа. Араас бөлөх оҕолорун бииргэ түмүү, маассабай тэрээһиннэри ыытыы бобуллар.