1998 сыллаахха, оччотооҕу Мииринэй улууһун баhылыга Виталий Басыгысов иилээн, кыаммат-тиийиммэт ыаллар оҕолоругар анаан «Харысхал» диэн реабилитационнай киин тэриллибитэ. Кииҥҥэ 1964 сыллаахха тутуллубут эргэ икки этээстээх дьиэ анаммыта.
Бу кэм устата, «Харысхал» Мииринэй куорат муор-туор олохтоох ыалларын кырачааннарын улаханнык абыраата. Босхо олоруу, иҥэмтэлээх аhылык, спордунан дьарыктаныы, оонньуу, араас хабааннаах куруhуоктар тиһигин быспакка ыытыллаллар.
Арай дьиэтэ эргэ буолан, истиэнэтэ хайыта барыталаан, саахалланар турукка тиийэн турар. «Харысхал» РК дириэктэрэ Муза Романова хас да сыллаах туруорсууларын түмүгэр аныгы моhуоннаах эбийиэк тутуллара быhаарыллыбыта.
Иккис сылын Хомсомуол аатынан уулуссабытыгар «Харысхал» аныгы барыйааннаах таас дьиэтэ тутуллар. Кээмэйинэн соччо улахана суох.
Ол эрээри, бэрт сэргэх быhыылаах, аныгы дизайн быыhыктаах дьиэ буолан эрэр. Эбийиэги Саха сирин Үүнэр көлүөнэ пуондата үбүлээн туттарар.
Тутуу бэрэстэбиитэлэ – «Строймонтаж2002» тэрилтэ, бэдэрээтчит – «Востокстройкомплектация» фирма. Тутуу үлэтэ кулун тутар ыйтан, халлаан сылыйаатын кытары биллэ тэтимирдэ.
Манна 15 Кыргызстантан кэлбит тутааччы үлэлиир. Тутуу ис бараана бүтэн, аны дьиэ иһинээҕи үлэ барар. Тутааччылар саҥа киини 2018 сыл ахсынньытыгар бүтэрэр былааннаахтар.
Станислав Алексеев, Мииринэй к.
Ааптар хаартыскалара.
