Киин куораппытыгар "Куттала суох айан суоллара" национальнай бырайыак иитинэн Ленин бэрэспиэгин хапытаалынайдык өрөмүөннүүр үлэ атырдьах ыйыттан саҕаланыаҕа. Бу туһунан мээр Евгений Григорьев иһитиннэрдэ.
"Бэдэрээччит быһаарыллыан иннинэ биһиги үлэни номнуо бэлэмниэхпитин наада. Онуоха хаһыы үлэлэрин, сырдатыыны, светофор үлэлиир кэмин эҥин уларытыахпытын наада. Быйыл бэрэспиэги өрөмүөннээһин атырдьах ыйыттан Кулаковскай уулуссатыттан саҕаланыаҕа", - диэн мээр эппит. Маныаха Кулаковскай уулуссатыттан Киров уулуссатыгар дылы барар үлэлэргэ сатыы дьоҥҥо туох да туорай, мэһэй суох буоларын хааччыйыахтаахтар. Маны таһынан, Аммосов, Киров уонна Яровсскай уулуссаларыттан кэлэр чалбаҕы түһэрэр лотуок баар буолуохтаах. Кулаковскай уулуссаҕа чалбах уутун муһан ыраастаан баран күөлгэ кутар курдук дьаһаныахтара. Ленин бэрэспиэгин өрөмүөннүүргэ балысхан үлэлэр 2021 сылтан 2023 сылга дылы ыытыллыахтара. Үлэлэр Хабаров уулуссатыттан Краснояров уулуссатыгар дылы барыахтара.
