Куораты тутуу уонна көлө департаменын начаалынньыга Северина Архипова иһитиннэрэринэн, Дьокуускай куорат Кузьмин уулуссатыгар 1500 миэстэлээх саҥа оскуола тутуута 2022 сылга саҕаланыаҕа уонна 2024 сылга бүтэн үлэҕэ киириэҕэ.
“Бу түөлбэҕэ гаас уонна уу ситимнэригэр кэккэ кыһалҕалар бааллар. Онон “Сахатранснефтегаз” уонна “Водоканал” тэрилтэлэрэ биһиэхэ көмөлөһөн, кыһалҕаны быһаараллара күүтүллэр. Оччотугар тутааччылар уонна инвестордар тутуу былаанын саҕалаан барыахтара этэ” диэн салайааччы этэр.
Билигин сири тутууга бэлэмнээһин, докумуоннарын ситэрэн-хоторон биэрии үлэтэ бара турар. Маны таһынан, саҥа оскуола тутуллуохтаах сиригэр икки мас дьиэни көтүрүү боппуруоһа быһаарыллыаҕа, олохтоохтору дьиэлэриттэн көһөрүү ыытыллыаҕа.
Салгыы баһылык куорат 38-с нүөмэрдээх оскуолатын сыбаайатын тупсарыыга, өрөмүөннээһиҥҥэ үлэ ыытылларын эттэ. Санатан эттэххэ, бу оскуолаҕа өрөмүөн үлэтэ муус устар ыйтан ыытылла турар. Үөрэнээччилэр үөрэх кэмигэр 30-с уонна 24-с нүөмэрдээх оскуолаларынан тарҕаһан үөрэх дьылын түмүктээбиттэрэ.
