Киир

Киир

Тохсунньу 28 күнүгэр Сибиир уонна Уһук Илин куораттарын ассоциациятын Сүбэтэ интэриниэт сибээс нөҥүө «Кыылларга эппиэтинэстээх сыһыан туһунан» федеральнай сокуон табыллыбатах өрүттэрин тула кэпсэтии ыытта. Тэрээһини Красноярскай куорат баһылыга Сергей Еремин салайда.

Манна Новосибирскай, Омскай, Красноярскай, Владивосток, Хабаровскай, Артем, Чита, Кемерово, Улан-Удэ, Иркутскай, Мииринэй, Братскай, Благовещенскай, Томскай, Южно-Сахалинскай, Магадан, Ангарск, Барнаул, Бийск, Комсомольск-на-Амуре куорат баһылыктара уонна бэрэстэбиитэллэрэ,  Судаарыстыбаннай Дуума дьокутааттара Алексей Диденко уонна Сардаана Авксентьева кытыннылар.   

Баһылыктар уонна бэрэстэбиитэллэр бу сокуону толорууга туох харгыстары көрсөллөрүн кэпсээтилэр. Кинилэр ОСВВ («отлов-стерилизация-вакцинация-возврат») бэрээдэгэ регионнар усулуобуйаларыгар сөп түбэспэтин туһунан биир санааны эттилэр. Ону ааһан, бу бэрээдэк дьон олоҕор улахан кутталы үөскэтэрин, олорор сир экологиятын алдьатарын өссө төгүл бигэргэттилэр.  Түмүккэ, ыттары приютка хаалларан иитии олохтоох бүддьүөккэ улахан хоромньуну оҥорорунан, бары биир киһи курдук утардылар.

Сүбэ быһаарыытынан, Дьокуускай баһылыгын Евгений Григорьевы Сибиир уонна Уһук Илин куораттарын ассоциациятын бэрэстэбиитэлин быһыытынан РФ Судаарыстыбаннай Дууматын «Кыылларга эппиэтинэстээх сыһыан туһунан» сокуоҥҥа көннөрүүлэри бэлэмниир хамыыһыйатыгар киллэрдилэр.  

Хаартыска: Дьокуускай куорат Уокуруктааҕы дьаһалтатын пресс-сулууспата

Тарҕат:

Санааҕын суруй