Саҥа сылга халлааммыт сылаас күннэринэн хадаҕалаан, томороон тымныылаах кыһыммытын номнуо умна быһыытыйдыбыт. Салгыҥҥа дьаарбайа тахсааччы, сатыы хаамааччы элбээтэ. Саас эрдэ кэлиэх чинчилээх.
Сотору киин куораппытыгар, үгэс быһыытынан, хаҥкылыыр сирдэр арыллыахтара. Алҕаһаабат буоллахпына, бастакынан куорат килбэйэр киинин Ленин болуоссатыгар арыллааччы. Бэҕэһээҥҥиттэн тутан эрэллэрин көрөбүн. Бүгүн чугаһаан кэпсэттим.
Хаҥкылыыр сири “Водоканал” АУо үбүлүүр уонна оҥорор. Тута сылдьар үлэһиттэр олунньу 15 күнүгэр диэри бүтэриэхтээхпит дэһэллэр. Мин көрдөхпүнэ, уутун кутан саҕалаабыттар. Ол эрээри туолуо өссө да ыраах үһү. Уопсайа 330 кубометр ууну кутуохтаахтар.
Былырыыҥҥыттан уратыта диэн, хаҥкыны уларсар сир тэйиччи буолбакка хаҥкылыыр сири кытта сыста турар буолар. Онон өрө-таҥнары сүүрүү тохтуур – уларсык хаҥкыны кэтээт да, мууска дайа тураҕын. Дьэ, кэмниэ-кэнэҕэс, хаҥкыгытын таһааран сытыылана сылдьыҥ.
Ленин болуоссатын хаҥкылыыр сиригэр чуолаан кыра саастаах оҕолор сөбүлээн сылдьаллар. Оскуолаҕа үөрэнии кэмигэр үргүлдьү манна кэлэр буолаллара. Өссө саастаах дьон кэлээччилэр. Ыраата барбакка, баҕардыҥ да тахсан, хаҥкылаан барарыҥ туох да ааттаах буоллаҕа. Биир эдэр оҕоттон итэҕэһэ суох элэгэлдьийэр эбэни интэриниэт ситимигэр элбэхтик таһаарбыттарын өйдүүр инигит?
Оттон биһиги «Ситим» медиа-бөлөх уонна куорат олохтоохторун аатыттан “Водоканал” АУо салайааччытыгар уонна үлэһиттэригэр саас ахсын бэртээхэй бэлэххит, кыһамньыгыт иһин барҕа махталбытын ыытабыт!
Кэпсэттэ Күндэли
