Атах тымырын лазерынан эмтиир аныгы ньыма

Атах тымырын ыарыыта (варикоз нижних конечностей) олус киэҥник тарҕаммыт ыарыы. Бу ыарыыны аахайбат буолуу, баалатыы киһи олоҕор кутталы үөскэтэр, улахан охсуулаах буолар. Биһиги дьолбутугар, Дьокуускайга «Центромед» клиника үтүөтүнэн “лазернай флебология” диэн атах тымырын эмтиир саҥа ньыма туттуллар буолбут. Ол туһунан биһиги клиника флебологияҕа отделениетын сэбиэдиссэйэ, хирург-флеболог Егор Николаевич Захаровтан ыйыталастыбыт.

– Егор Николаевич, “лазернай флебология” диэн тугуй уонна үгэс буолбут эпэрээссийэттэн туох уратылааҕый?

– Лазернай флебология диэн атах тымырын ыарыытын (варикоз нижних конечностей) эмтиир хирургия саҥа, тупсаҕай хайысхата. Ол эбэтэр биһиги лазер көмөтүнэн атах тымырын ыарыытын киһиэхэ туох да охсуута суох эмтиир буоллубут. Манна уопсай утутуу (наркоз), ханнык да хайытыы уонна уһун реабилитация ирдэммэт. Үгэс буолбут эпэрээссийэттэн сүрүн уратыта итинник. Урут бу ньыманан эмтэнээри, дьон ыраах сытар киин куораттарга айанныыра. Оттон билигин ким баҕарар Дьокуускайга кэлэн атаҕын тымырын эмтэтэн барар кыахтанна.

– Бу ньыманы хаһааҥҥыттан туһанаҕытый уонна дьон төһө абыранна?

– Ааспыт сыл сэтинньитигэр биһиги «Центромед» клиникабыт салалтата, олохтоох дьон ыраах айаннаабакка уонна эрэйи көрбөккө дойдуларыгар олорон эмтэнэллэрин туһугар, Лазернай флебология отделениетын арыйарга быһаарбыта. Арыллыахпытыттан түөрт ый ааста. Ол тухары олус элбэх киһиэхэ көмөлөстүбүт. Лазерынан эмтээһини таһынан склеротерапия (эстетическэй хирургия көрүҥэ) элбэх процедуратын оҥордубут. Нэһилиэнньэ, маннык өҥө баарын сыыйа-баайа билэн, үрдүк таһымнаах ньыманан эмтэнэрэ элбээтэ.

– Лазернай флебология отделениетыгар хас быраас үлэлиирий уонна туох тэрили туһанаҕытый?

– Бу хайысхаҕа идэтийбит хирург-быраастар үһүөбүт. Мин сэбиэдиссэйбин. Сүрүннээн, аныгы кэм мэдиссиинэтин ирдэбилинэн, флебологияҕа анаан оҥоһуллубут “Лахта-Милон” аппарааты туһанабыт. Бу ыалдьыбыт тымыры (венаны) эмтиир (облитерация) бастыҥ аппарат. УЗИ чинчийиитин оҥорор аппарааппыт эмиэ тымыры көрөргө аналлаах. Ити тэриллэрбит тиэйэ сылдьарга олус табыгастаахтар, онон хайа баҕарар сиргэ, улууска тиийэн көрөр, эмтиир кыахтаахпыт.

– Атах тымырын лазерынан эмтээһини кимиэхэ уонна ыарыы ханнык таһымыгар аныыгытый?

– Лазерынан эмтээһини улахан дьоҥҥо сааһыттан тутулуга суох ыарыы хайа баҕарар таһымыгар оҥоробут. Ыарыһах кэлбит күнүгэр тута атаҕын тымырын үөрэтэн көрөбүт (УЗИ) уонна ыарыы хайа таһымҥа сылдьарын быһаарабыт. Ыарыы саҥа саҕаланан эрэр, ол эбэтэр “венознай сеточка, звездочка” үөскээбит (I стадия) буоллаҕына, “компрессионная склеротерапия” диэни аныыбыт, ол эбэтэр атахха тымыр ыарыытын тохтотор эми укуоллуубут, компрессионнай чулкуну кэтэрдэбит. Оттон тымырга номнуо “узел” үөскээбит буоллаҕына (II стадия), лазерынан эмтээһини аныыбыт, онно ирдэнэр анаалыстары ылабыт, киһи уопсай туругун учуоттаан, лазерынан эмтээһини саҕалыыбыт. Ыарыы уустугурбут таһымыгар, ол эбэтэр тымырга хаан бөлөҕө (тромб), трофическай язва үөскээбит түгэнигэр (III - IV стадия), ону аҕыйатар эбэтэр суох оҥорор 15-45 күннээх эминэн терапияны ыытабыт. Кутталы үөскэтэр хаан бөлөҕө, трофическай язва искэнэ аҕыйаатаҕына, лазерынан эмтээһини ыытабыт.

– Атах тымырын лазерынан эмтээһини ханна уонна хаста оҥороҕут?

– Ол ыалдьыбыт тымыр ахсааныттан уонна ыарыы хайа таһымҥа сылдьарыттан тутулуктаах. Биир атахха биир тымыр эмтэнэр түгэнигэр биир чаастаах лазернай процедуранан уонна салааларын склерозациялааһыынан бүтүөн сөп. Оттон “уустук” тымырдаах атах буоллаҕына, эмтээһин арыычча атын хайысханан оҥоһуллар. Эмтээһин клиникаҕа ыытыллар, балыыһаҕа киирэн сытар ирдэммэт.

– Бу хайдах быһыылаахтык ааһарый?

– Эппитим курдук, лазерынан эмтээһини анал аппараат көмөтүнэн ыарыһаҕы утуппакка эрэ оҥоробут. Онон кини тугу гынарбытын барытын көрө-истэ сытар. Тугу да хайыппаппыт, онон ыарыһахха туох да куттал үөскээбэт. Уонна саамай үчүгэйэ – эпэрээссийэ кэнниттэн ыарыһах тута дьиэтигэр барар, ол эбэтэр кини күннээҕи олоҕор тута төннөр. Биһиги киниэхэ компрессионнай чулкуну эрэ кэтэрдэбит. Оннооҕор сорох пациеннарбыт лазерынан эмтэниини эбиэт кэмигэр кэлэн оҥорторон барбыт түгэннэрэ баар. Эмтэнээччи “больничнайы” ылыан да, ылымыан да сөп.

– Итинник эмтэммит киһи туруга төһө түргэнник тупсарый уонна салгыы хайдах харыстаныахтааҕый?

– Бу процедура кэнниттэн киһи уопсай туруга тута тупсар, атаҕа иһэн тахсыыта, ыарыыта сүтэн, хаана үчүгэйдик эргийэр буолар, чэпчиир. Ол да иһин киһи туруга эрэ буолбакка, олоҕо эмиэ биллэрдик тупсар. Аны туран, харыстаныы өттүгэр улахан хааччах да, бобуу да суоҕун кэриэтэ. Үгэс буолбут эпэрээссийэ кэнниттэн киһи биир сыл кэриҥэ харыстанар, чөлүгэр киирэр буоллаҕына, лазерынан эмтээһин кэннэ – биир эрэ ый. Арай харыстаныы сүрүн усулуобуйата – компрессионнай чулкуну биир ый кэтэ сылдьыахтаах, итии ваннаҕа сытыа, итии паарга туруо суохтаах диэн.

– Атах тымырын лазерынан эмтээһин сыаната туохтан тутулуктааҕый?

– Эмтээһин сыаната ыалдьыбыт тымыр ахсааныттан тутулуктаах. Манна УЗИ-тан саҕалаан анаалыстар уонна лазерынан эмтээһин сыаналара киирэ сылдьаллар. Компрессионнай чулкуну бэйэбит биэрэбит. Эрдэ атыыласпыт матырыйаалбыт баар буолан, ый кэриҥэ сыанабытын уруккунан тутан турар санаалаахпыт. Онон, Сахабыт сирин олохтоохторун сыана үрдүүрүн кэтэспэккэ, биһиэхэ кэлэн атаххыт тымырын көрдөрүҥ, баалаппакка кэмигэр эмтэтиҥ диэн ыҥырабын.

– Егор Николаевич, сүрдээх туһалаах кэпсээниҥ иһин махтал. Тус бэйэм атаҕым тымырын көрдөрүөхпүн баҕарбытым ыраатта. Онон, эһиэхэ кэлэн эмтэтэ охсон, сайын чэбдик атахтаах сылдьарга кыһаллыам.