Киир

Киир

Мииринэйгэ ыам ыйын саҕаланыытыгар кыһыҥҥы ыйдары кытары холоотоххо, үлэ буларга балаһыанньа соччото суох.

Бырамыысаланнай тэрилтэлэр тобус-толорулар. Алмаастаах хампаанньаҕа төрүт санаммаккын даҕаны. Кыахтаах ньиэп-гаас тэрилтэлэрэ сэдэхтик үлэ миэстэлэрин тосхотоллор. Тахсыбыт бакаансыйалары Забайкалье, Иркутскай, Орто Азия дьоно тутатына бобо харбаан ылаллар.

Бүгүҥҥү информациябын олохтоох “MирокБиз” интернет-портаалтан туһанабын. Дьэ, баар аҕыйах бакаансыйалары сыымайдыахха.

Мииринэйгэ уот күүрүүтүн лииньийэтин (ЛЭП) өрөмүөннүүр уонна хааччыйар электромонтердар бастайааннай үлэҕэ ирдэнэллэр. Үлэ Кодексынан сирдэтиллэр, социальнай бакыат көрүллэр. Хамнаһа – 60 тыһыынча солк.

«Иирэлээхнефть» тэрилтэ эколог көрдөөбүтэ быданнаата. Бу туһунан урут эмиэ суруйан турабын. Хамнаһа – 114 тыһыынча солк. Табаар оператора эмиэ бу тэрилтэҕэ ирдэнэр. Хамнаһа – 51 тыһыынча солк.

Мииринэй уонна Ньурба ХБК-ларын холбооһунтан үөскээбит Мииринэйдээҕи-Ньурбатааҕы хайаны байытар кэмбинээт (МНГОК) туох да идэтийиитэ суох оробуочайдары үлэҕэ ыҥырар. Бу аата, «АЛРОСА» хампаанньата араас хабааннаах эбийиэктэригэр көмө үлэ дэнэр. Бастатан туран, Мииринэйтэн 25 биэрэстэ тэйиччи сытар Алмазнайга тоҕустан биэс чааска диэри үлэлиир оробуочайдар ирдэнэллэр. Хамнастара – 35 тыһыынча солк. Бу үлэни ыйыталаһа Ленинград бэрэспиэгэр 20 «Б» аадырыска турар Ньурба ХБК-тын хонтуоратыгар тиийиэххитин наада.

Онно эһигини маастар көрсөн үлэ боппуруоһа быһаарсыллар. Мииринэй куорат иһигэр үлэлээччилэр хамнастара – 30 тыһыынча солк.

Эбии эттэхпинэ, Накыын бөһүөлэгэр анаан уопсайдары хомуйааччылары ыҥыраллар. Баахта ньыматынан икки-үс ыйдаах үлэ. Хас ый аайы 45 тыһыынча солк хамнас төлөнөр.

«Снабинжиниринг» ХЭТ дьиэни хомуйааччылары уонна идэтийиитэ суох оробуочайдары көрдүүр. Бу – эмиэ баахта. Хамнастара – 65 тыһыынча солк.

Бастайааннай үлэ чааһынан Мииринэйгэ болуоссаттары, искибиэрдэри, олбуору уонна уулуссалар «чанчыктарын” сиппийээччилэр (дворниктар) бакаансыйалара мэлийдилэр. Хамнастарын ыйыттахха кистээбэккэ этэллэр – 28-30 тыһыынча солк. Дьэ ити курдук. Билигин ханнык баҕарар үлэ – күндү!

Атыннык эттэххэ, Мииринэйгэ идэтийиитэ суох үлэһиттэри көрдөөһүн лаппа улааппыт эбит.

Идэтийиитэ суох үлэИдэтийиитэ суох үлэОлбуор сиппийээччилэр кыра да хамнаһы сирбэттэрОлбуор сиппийээччилэр кыра да хамнаһы сирбэттэр

Станислав Алексеев. Мииринэй куората. Ааптар хаартыската.

Тарҕат:

Санааҕын суруй