Киир

Киир

Күөх сайын барахсан минньигэс дыргыл отунан, айылҕа дьэрэкээн ойуутунан дьон сүрэҕин сылаанньытан эрэрэ үөрүүлээх. Алмаастаах кыраай киинин олохтоохторун үгүстэрин ымыы туттар санаалара - бу дойдуттан хайдах эмит “куотан” соҕуруу, үтүө айылҕалаах, экологиялаах сиргэ сынньаммыт киһи диэн.

Кырдьыга да оннук. Мииринэйгэ сайылыыр соччото суоҕа биллэр. Күнэ-дьыла да кубулҕат. Элбэх сайын сайылаатым да, сайын үчүгэйин манна дьөрү билбэтим.

Даҕатан туран, Мииринэй куорат олохтоохторо ханна сынньаныахтарын баҕаралларын туһунан чыпчылҕан-ыйытык оҥордум.

Дьэ, ыйытыыларга киириэххэ.

 В. Селиверстов:

Мин Алтаай кыраайыттан Бийскайтан төрүттээхпин. Дьоҥҥо бу Алтаай курдук сиэдэрэй айылҕалаах, кедр мастаах күөх торҕо тыалардаах, дьэҥкиртэн дьэҥкир ыраас уулаах дьүүктэлэрдээх, үрэхтэрдээх, күөллэрдээх, хайалардаах, киһи этин-хаанын чэбдигирдэр сири кытары билсиһэллэригэр баҕарабын.

Алтаай минеральнай сыккыстардаах куруортардаах.

Хоруона хамсыгыттан эттэрэ-хааннара энчирээбит дьоҥҥо балар олус туһалаахтар дииллэр. Тус бэйэм Алтаайтан ураты ханнык да сиргэ барааччым суох. Новосибирскайынан айаннааччыбын.

Тимир суола да баар, оптуобус да сылдьар. Холобур, минеральнай уулаах Белокурихаҕа диэри Новосибирскай тимир суолун баксаалыттан сэттэ чаас устата оптуобуһунан айанныыгын. Оптуобус билиэтэ – балтараа тыһыынча эрэ солкуобай.

В. Лим:

Төттөрү-таары айаннныыр суолум («Оплачиваемый проезд») баар. Сочилыыр, Хара муораҕа дьоммун кытары сөтүөлүүр санаалаахпын. Муората, чаҕылхай күнэ суох төрүт сатаммаппын.

Ц. Содбоева:

Бүрээтийэҕэ Тункаҕа барыам. Урууларбар. Онно салгына да ыраас, айылҕата да туох да наһаа үчүгэй. Минеральнай уу да баар. Биһиэхэ сынньанар сир элбэх – Байкалга, Ольхон арыыга, Хужирга, Аршаҥҥа.

Амантур:

Бэйэм уоппускам суох. Үлэлиибин. Саха сирин олохтоохторуттан бэрт элбэх киһи Иссык-Кульга сынньанааччы.

Иссык-Куль курдук ып-ыраас уулаах күөл Орто Азияҕа да суоҕа буолуо. Уйгуур, узбек куукуната: лагман, плов, фрукта дэлэй.

Биэ кымыһын, шашлыгы ханна барытыгар атыылыыллар. Сыаналара – кэппиэйкэ.

В. Нифонтов:

Башкортостаҥҥа күүлэйдии барыахпын баҕарабын.

Мииринэйгэ урут олорбут, кэлин онно көспүт билэр дьонум элбэхтэр. Уфа куоракка харах ыарыыларын эмтиир сүрдээх үчүгэй офтальмология клиникалаахтарын истибитим. Онно эдьиийбин көрдөрүөхпүн баҕарабын.

Иван П.:

Турцияҕа сынньанар былааннаахпын. Москубатааҕы туризм пиирмэлэриттэн путевка атыылаһыам. Интернети хаһыстахха удамыр сыаналаах пиирмэлэр бааллар эбит.

Ноговицына В.:

Санкт-Петербург куоракка кыыспынаанан барыахпыт. Төрдүс төгүлүн Питерга сырыттым да ол диэки көһөр санаам күүһүрэн иһэр. Мииринэйгэ олорбут дьон да онно элбэхтэр. Биэнсийэлээхпин.

Станислав Алексеев. Мииринэй куората.

  

Тарҕат:

Санааҕын суруй