Киир

Киир

Дьокуускай куорат 2 №-дээх оскуолатыгар үөрүүлээх быһыыга-майгыга В.И. Ленин аатынан Бүтүн Сойуустааҕы пионер тэрилтэтин 100 сылын бэлиэтээһин буолан ааста.

“Вступая в ряды пионерской организации, перед лицом своих товарищей торжественно клянусь!..” – диэн тыллары урут пионер кыһыл хаалтыһын баана сылдьыбыт дьон бары нойосуус өйдүүр буолуохтаахтар. Ол курдук өйбүтүгэр-санаабытыгар пионер оҕо сааспыт дириҥник иҥэ сылдьар.

Ким эрэ бэргэнник бэлиэтии көрөн эппитинии, оччолорго пионердаабатах сэбиэскэй оҕону, билигин соцситимҥэ страницата суох оҕо курдук, дьиктиргии көрөллөрө.

9c575412 5953 4eda b58e 2047b290dd2b копия

Биһиги пионердыыр оҕо сааспытын арамаантыкалаах кутаа уоттаах, барабааннаах, гуоруннаах, туттуллубат кумааҕы хомуйуулаах уонна “Зарницалаах” ыраас, сырдык дьоллоох оҕо сааспыт кэрэ кэмин курдук саныыбыт. Ити элбэх оҕо биир тыыҥҥа, доҕордуу сыһыаҥҥа үөрүүлээх өрөгөйдөөх иитиллиитэ этэ.

2022 с. ыам ыйын 19 күнүгэр Дьокуускай куорат 2 №-дээх оскуолатыгар буолбут тэрээһиҥҥэ, пионердар тэрилтэлэрэ 100 сылыгар анаммыт үөрүүлээх илиниэйкэҕэ, урукку сыллар пионердара – оскуоланы араас кэмҥэ бүтэрбит дьон бочуоттаах ыалдьыт буоллубут.

 DSC1572а

Оскуола дириэктэрэ В.М. Владимиров арыйбыт үөрүүлээх илиниэйкэтэ пионердар тэрилтэлэрин бары үгэстэрин тутуһан ыытылынна. Этэрээттэр устуруойдаатылар, билиҥҥи оскуола оҕолорун этэрээттэрин сэбиэттэрин бэрэссэдээтэллэрэ, ону таһынан пионерия бэтэрээннэрэ араапардаатылар. Элбэх барабаан доҕуһуолунан Ем. Ярославскай аатын сүгэр 2 №-дээх оскуола номоххо киирбит пионерскай дружинатын знамята таҕыста. Биһиги оскуолабыт пионерскай дружината куорат оскуолаларын үрдүнэн 11 төгүл уҥа флангаҕа бастакы турар дружина үрдүк аатын ылбыта.

Танцует младшее поколение

Урукку пионерскай тэрилтэ нэһилиэнньиктэрэ – билигин баар оҕо холбоһуктарын хамандыырдара оскуола ыстаарсай баһаатайа Б.С. Корниловка араапардарын салгыы туттардылар.

Эҕэрдэ тылы мустубут дьоҥҥо бу оскуоланы бүтэрбит, билигин Дьокуускай куорат Дууматын бэрэссэдээтэлин солбуйааччы Е.И. Евсикова, педагогическай үлэ бэтэрээннэрэ М.И. Тутасова, Т.М. Ильина, оскуола 80-с сыллардааҕы ыстаарсай баһаатайа Н.А. Барашкова, оскуоланы араас кэмҥэ бүтэрбит Т.В. Иванова, Н.Д. Осипова (Кузьмина), И.А. Черемкина, В.П. Левина уо.д.а. үөрэн, долгуйан туран тыл эттилэр.

В.П. Левина куорат оскуолаларын үрдүнэн киэҥник биллибит Г.А. Хайдурова кэнниттэн ыстаарсай пионер баһаатайынан үлэлээбитэ. Г.А. Хайдурова ыстаарсай баһаатайынан үлэлиир кэмигэр биһиги оскуолабыт пионерскай дружината саамай элбэх үрдүк көрдөрүүнү ситиспитэ.

Оскуола пионердарын олоҕо оргуйан олороро, пионерскай хоско оҕо толору буолара, барыта олус интэриэһинэйэ. Галина Анисимовна оскуола оҕолорун маҕыньыыт курдук тардара, күүрээннээх эниэргийэтинэн оҕолору иитэрэ.

2017 с. оскуола олбуорун иһигэр номоххо киирбит пионер баһаатайга пааматынньык туруоруллубута. Г.А. Хайдуроваҕа пааматынньыгы туруорууну оскуоланы араас кэмҥэ бүтэрбит дьон туруорсубуттара. Пааматынньык оскуолаҕа 10-тан тахса сыл дириэктэрдээбит А.К. Семёнов быһаччы өйөбүлүнэн тутуллубута. Пааматынньыгы саха биллэр скульптора Николай Чоччасов оҥорбута. Харчытын оскуоланы урукку сылларга бүтэрбит выпускниктар бары кыттыһан хомуйбуттара.

 DSC1592а

Харчы хомууругар ыытыллыбыт аһымал кэнсиэргэ оскуоланы урут бүтэрбит, өрөспүүбүлүкэҕэ биллэр мусукааннар, ырыаһыттар кыттыбыттара. Олор истэригэр мелодист, СӨ култууратын үтүөлээх үлэһитэ, СӨ доруобуйатын харыстабылын туйгуна, мэдиссиинэ билимин хандьыдаата, ХИФУ тэрэпиийэҕэ салаатын дассыана Виталий Андросов, СӨ култууратын миниистирин солбуйааччы, РФ уонна СӨ үтүөлээх артыыската Марина Силина, СӨ норуодунай артыыһа Александр Бурнашов, СӨ култууратын туйгуна Наталья Кривошапкина-Далаана уо.д.а. бааллара.

Г.И. Хайдурова пааматынньыгар сибэкки уурууга Галина Иннокентьевна кийиитэ С.Г. Хайдурова, сиэннэрэ Роман, Анна кэлэн кытыннылар. Светлана Геннадьевна Галина Анисимовна туһунан ахтыыны сэргэ дьиэ кэргэҥҥэ кини туһунан үтүө өйдөбүлү оҕолоругар иҥэрэллэрин кэпсээтэ.

Пионерия күнүн тэрээһиннэриттэн оскуоланы 1977 с. бүтэрбит оҕолор үөрэммит оскуолларын искибиэригэр анаан сакаастаан оҥорторбут, ааттара суруллубут ыскамыайкаларын бэлэхтээбиттэрэ үтүө үгэскэ кубулуйан эрэрин бэлиэтиэххэ сөп. Бу үтүө санааны 1976, 1978 сс. бүтэрбит үөрэнээччилэр эмиэ өйөөн, бэйэлэрин ыскамыайкаларын бэлэхтээтилэр уонна бу үтүө бачыымы атын кылаастар өйүөхтэрэ диэн эрэнэллэрин эттилэр.

Бүтүүтүгэр мустубут дьоҥҥо Н.Д. Гусевская салайааччылаах оскуола хуора “Взвейтесь кострами, синие ночи!”, “Песня о первом пионерском отряде", "Картошка" диэн курдук пионер оҕо сааспыт умнуллубат ырыаларын ыллаатылар. Кыра кылаас оҕолоро “Солнечный круг” үҥкүүлээтилэр. Араас сыллар пионердара биир улахан түһүлгэҕэ төгүрүччү туран пионер эрдэҕинээҕи ырыаларыттан попурри ыллаатылар, сүргэлэрэ көтөҕүллэн, үөрэн-көтөн тарҕастылар.

812d0049 77d0 4896 9c60 f0eb1b63bfc1

Биһиги, оскуолабыт араас сыллардааҕы пионердара, бүтэрбит дьон, бу үйэлээх үтүө үгэһи сөргүппүт, оскуоланы 1977 с. бүтэрбит Е.Н. Николаеваҕа, оскуола эстиэтикэҕэ киинин салайааччыта Н.Д. Гусевскаяҕа, оскуола кэлэктиибигэр пионер тэрилтэтэ тэриллибитэ 100 сылыгар аналлаах бу бэртээхэй тэрээһини бэлэхтээбиттэригэр улахан махталбытын биллэрэбит.  

9c575412 5953 4eda b58e 2047b290dd2b копия

Надежда Кузьмина, оскуола 1977 с. бүтэрбит үөрэнээччитэ.

 А. Варламов хаартыскалара.

Тарҕат:

Санааҕын суруй