Үбүлүөйдээх сайыны Дьокуускай сибэккинэн симэнэн көрсүөҕэ диэн дьаһалта пресс-сулууспата суруйар. Болуоссаттары уонна искибиэрдэри көҕөрдүүгэ, көрүүгэ-истиигэ быйыл 19 мөл. солк. көрүллүбүт.
Бу харчынан Ийэ искибиэригэр, «Туймаада Саллаата» кэриэстэбил комплексыгар, Кыайыы, Ороджоникидзе болуоссаттарыгар, «Георгий Победоносец» бөҕөргөтүүлээх биэрэккэ уонна да атын куорат кэрэхсэнэр сирдэригэр анаан, өҥ буору атыылаһыахтара,114 тыһ. сибэккини, 4 тыһ. кэриҥэ маһы уонна сэппэрээги олордуохтара, уустук композициялары оҥоруохтара. Биллэн турар, көҕөрдүү ис хоһоонун барытын Ийэ сылын, Саха АССР төрүттэммитэ 100 сылын, Дьокуускай 390 сылын кытта дьүөрэлиэхтэрэ.
Манна «кохия» диэн композиция оҥоруутугар киэҥник туттуллар, кырыйарга табыгастаах үүнээйини элбэхтик туһаныахтара. Ону сэргэ, дьон сөбүлээн сынньанар, дьаарбайар сирдэригэр «декоративнай табак» диэн 2020 сыллаахха элбэх биһирэбили ылбыт үүнээйини улахан вазоннарга олордуохтара. Оттон Ийэ искибиэригэр Ийэ сылыгар аналлаах топиарнай фигураны туруоруохтара.
