Киир

Киир

2012 сыллаахтан ылата, Мииринэй оройуоннааҕы балыыһатын (МЦРБ) базатыгар Дьокуускайдааҕы медколледж филиала ситиһиилээхтик үлэлиир.

Бу иннинэ, медсиэстэрэ уонна биэлсэр идэлэрин ылаары, ыччаттар кый ыраах Дьокуускайга, Алдаҥҥа, Нерюнгрига барыталыыллар этэ.

Эмчиттэргэ анаммыт дьиэ

Онтон МЦРБ салалтата (оччолорго кылаабынай быраас С. Петров этэ) Дьокуускайдааҕы медколледж дириэктэригэр Д. Алексеевка Мииринэйгэ филиал аһылларыгар көрдөһүүлээх тахсыбыта.

Эппиэт дьэҥкэ буолбута – Д. Алексеев Мииринэйгэ медколледж самалыга аһылларын туһугар ахсаабат кыһамньытын уурбута. МЦРБ сыалын-соругун ситиспитэ. Бу ааспыт уон сыл устата Дьокуускайдааҕы медколледж Мииринэйдээҕи самалыгар бэрт элбэх, орто медицинскэй персонал үлэһитэ бэлэмнэннэ.

Ол эбэтэр, куораппыт ыччаттара миэстэтигэр үлэлии-үлэлии орто медицинскэй идэлэри баһылаатылар. Сорох ыччаттар үөрэхтэрин ХИФУ медицинскэй институтугар салҕыыллар. Ити курдук МЦРБ бэйэтин каадырдарын иитиитигэр тоҕоостоох усулуобуйаны мүлчү туппата. Ол да буоллар эмчит Мииринэй курдук улахан оройуоҥҥа син-биир тиийбэт. Тоҕо тиийбэтин биричиинэтэ үгүс.

Холобура, 2009-2012 сылларга, дьиэлэрин боппуруостара сатаммакка, 17 саха эдэр кыргыттара мантан тэскиллээбиттэрэ. Түөрт-биэс сылы тулуйбуттара буоллар эдэр эмчиттэр саҥа таас дьиэлэригэр хос ылыахтара хаалбыт.

2016 сыллаахха, 71 кыбартыыралаах, тоҕус этээстээх эмчиттэр дьиэлэрэ тутуллан бүппүтэ. Онно тутатына Забайкальеттан кэлбит быраастар, биэлсэрдэр, медсиэстэрэлэр олохсуйан абыраннылар. Эдэр үлэһиттэргэ өйөбүл билигин баар. Эдэр быраастар уонна орто мэдиссиинискэй персонал «подъемнай» харчы ылыылара бигэ быраабылаҕа кубулуйда. Ити курдук, Мииринэй балыыhатын салалтата эдэр эмчиттэргэ табыгастаах усулуобуйа тэрийэ сатыыр.

Бу ыччаттар МЦРБга үлэлии үлэлии үөрэнэллэр

2022–2023 үөрэх сылыгар Дьокуускайдааҕы медколледж Мииринэйдээҕи филиала абитуриеннары ыҥырар. Онно маннык идэлэр бааллар:

  •  “Лабораторное дело” – үөрэҕин кэмэ икки сыл уон ый.
  •  “Лечебное дело” – үөрэҕин кэмэ үс сыл уон ый.

Үөрэххэ киириигэ докумуоннары тутууну бэс ыйын 21 күнүгэр саҕалаатылар.

Онно туох докумуон ирдэнэрий?

  • Пааспар. 11 кылааһы бүтэрии туһунан аттестат.
  • 086 пуормалаах мед-ыспараапка.
  • Быһыы ылааһын туһунан сертификат (куоппуйа).
  • СНИЛС(куоппуйа).
  • ИНН(куоппуйа).
  • 3/4 хаартыска.

Чэйиҥ, уолаттар уонна кыргыттар кытаатыҥ! Билигин эмчит идэтин ханна баҕарар өрө тутар буоллулар.

Станислав Алексеев. Мииринэй куорат. Ааптар хаартыскалара. МЦРБ саайтын информациятын туһанным.

Тарҕат:

Санааҕын суруй

Бүтэһик сонуннар