Дьокуускай бэлисипиэт тэбээччи актыбыыстара баһылык Евгений Григорьевы кытта көрүстүлэр уонна балаҕан ыйыгар Бэлисипиэт успуордун күнүн кыттыһан тэрийэр туһунан дуогабардастылар. Бу тэрээһин Куорат күнүн уонна Саха АССР тэриллибитэ 100 сылын чэрчитинэн ыытыллыаҕа.
Кэлиҥҥи кэмҥэ бэлисипиэти сэҥээрээччи элбээн, саахалга түбэһии, оһоллонуу үксээбит. Сорох бэлисипиэттээх дьон суол быраабылатын үөрэппэккэ, араас сэрэхтээх хамсаныылары оҥороллор, сүлүөмү, “наколеннигы” кэппэттэр, сүбэлэри тутуспаттар.
– Куорат олохтоохторо, биллэн турар, бэлисипиэт тэбээччилэри суол быраабылатын билиэхтэрин, сэрэхтээх буолуу бары ирдэбилин тутуһалларыгар баҕараллар. Биирдиилээн тэрилтэлэр, оскуолалар ыытар тэрээһиннэрэ кыра, манна маассабай ылсыы наада. Ол иһин биһиги куорат актыбыыстарын кытта балаҕан ыйын 4 күнүгэр Дьокуускай киин уулуссаларыгар бэлисипиэттээх парааты тэрийэр туһунан кэпсэттибит. Параакка ким баҕалаах кыттыан сөп. Икки көлүөһэлээх тырааныспары таптыыр, сөбүлээн тэбэр куорат олохтоохторугар улахан бырааһынньык буолуоҕа, – диэн Евгений Григорьев эттэ.
Маны таһынан, Дьокуускай куорат күнүн чэрчитинэн балаҕан ыйын 10 күнүгэр Ленин бэрэспиэгэр критериум-куоталаһыыны тэрийэр туһунан баһылык этии киллэрдэ.
Бэлисипиэт тэбээччилэр былааннарын кэпсээтилэр. Бэлисипиэт успуордун күнүгэр Бүлүүлүүр суол 126 килэмиэтириттэн 26-с килэмиэтиригэр диэри шоссеҕа куоталаһыыны тэрийэр санаалаахтар. Манна өрөспүүбүлүкэ араас муннугуттан уопуттаах спортсменнар кыттыахтара. Птицефабрика уонна Чочур Мыраан түөлбэлэригэр хайаҕа сүүрдэр бэлисипиэттээхтэргэ анаан маассабай куоталаһыы буолуоҕа.
Дьокуускай дьаһалтатынпресс-сулууспата.
