Киир

Киир

Өрөбүллэргэ Сахабыт сирин киин куоратыгар дьон хайдах сынньанарын, тугунан дьарыктанарын билээри түүҥҥү куорат устун хаамтыбыт, элбэх дьонноох уһун синньигэс уулуссалары кэрийдибит. Ол сылдьан тугу көрбүппүтүн фоторепортаж оҥорон ааҕааччыларбыт болҕомтолоругар таһаарабыт.

Атырдьах ыйын 6 күнэ, субуота:

вход парка

Оҕо аймах сөбүлээн сылдьар сиригэр, пааркаҕа, сабыллыан иннинэ бара сырыттым. Санатар буоллахха, паарка түүн 11 чааска диэри аана аһаҕас, ол эрээри аттракционнар бу кэмҥэ үлэлээбэттэр. Арай «Колесо обозрения» эрэ түүҥҥү өттүгэр үлэлиир. Ону кытта ас-үөл, оҕо оонньуурун атыылыыр дьоҕус киоскалар үлэлииллэр. Биһиги тиийбит күммүтүгэр өрөбүл буолан, дьон-сэргэ, оҕо-уруу элбэх эбит.

колесо

Былырыын пааркаҕа аһыыр сирдэри тупсаран оҥор­бут­тара, онон, дьон бөҕө үмүө­рүһэр, салгын сии таарыйа сынньана, аралдьыйа кэлэр буолбут. Киһи пааркаҕа киирээт, аһыыр сири ыраахтан көрөн, муусукатын тыаһын истэн билэр. Аҥаардас интерьерэ даҕаны кырасыабай, ураты: араас дьэрэкээн сибэккилээх кулуумбалар, көстүүнү киэргэтэр өрүс таастара, олорор сир да тупсаҕай оҥоһуулаах. Аһыыр сир тула уот-күөс, гирлянда бөҕө ыйаммыт. Ханна эрэ атын куоракка сынньана эбэтэр киинэҕэ сылдьар курдуккун.

парк аьыыр сир 2парк аьыыр сирПааркаттан тахсан иһэн көрбүтүм: арай “Туймаада” стадиоҥҥа футболистар оонньуу сылдьаллар эбит. Туох эрэ күрэхтэһиитигэр бэлэмнэнэ сылдьаллара эбитэ дуу, таах мээчик тэбиэлии сылдьаллара эбитэ дуу, ким билэр...

футболисты

Түүҥҥү куорат олоҕун суруйа тахсыбыт буолан, быраабыла курдук, ыччат сөбүлээн сылдьар “Зодиак” үҥкүү түһүлгэтигэр сырыттым. Массыына буолунай, киһи бөҕө. Киирии билиэт сыаната – 500 солк. Дьон таҥаһын-сабын көрдөххө, кэрэ аҥаар өттө чып курдук оҥостон кэлэр дойдута эбит: хобулуктаах түүппүлэ, дьууппа, былаачыйа, кырааска-самааска. Эр дьон, онно холоотоххо, бэрт судургутук таҥнар эбит. Муусука, үҥкүү-битии, уот-күөс ынырык. Итирик туруктаах дьон ахсаана биллэ элбэх... Бары сынньана, күүлэйдии, “тыыннарын таһаара” сылдьаллар. Улахан этиһии, охсуһуу суохха дылы.

зодиак 1 1 1

Атырдьах ыйын 7 күнэ, өрөбүл:

202 фудкорт

Олохтоохтор сөбүлээн сылдьар сирдэригэр, 202-с түөлбэҕэ эмиэ тиийэ сырыттыбыт. Куорат бу муннугар кэнники кэмҥэ киһи кырыы-кырыытынан мустар буолбут. Онон сибээстээн, ас атыылыыр араас фуд-корт, киоска, чааһынан арыандаҕа бэриллэр бэлисипиэт, скутер, электросамокат уонна кальян кытта бааллар. Массыыналаах эдэр ыччат эмиэ манна мустар. Массыына мааркатын бары көрүҥэ манна баар: тойота, хонда, субару, ниссан, маркообраз, крузак, матасыыкыллар да хаалбаттар. Ардыгар миэстэ булан турбат кыһалҕата.

202

Бэлисипиэттии, электросамокаттыы уонна таах кофе иһэ, салгын сии тахсыбыт дьон эмиэ баар.

самокат

Ол кэннэ “Речпорка” бара сырыттыбыт. Манна уруккута массыынанан дрифт эргитэ кэлэр буоллахтарына, билигин дьаарбайа, доҕоттор-атастар көрсөн кэпсэтэ кэлэр сирдэрэ буолбут. Санатар буоллахха, өрдөөҕүтэ бу түөлбэ олохтоохторо “түүнү быһа массыына хаһыытыыр тыаһын истэбит, кыайан утуйбаппыт” диэн улахан айдааны таһаарбыттара. Ол иһин манна “круговой суолга” “лежачий полицейский” диэн оҥоһуу оллурдары уурбуттара.

WhatsApp Image 2022 08 15 at 17.40.21

Бу хаартыскаҕа эр дьон, кофе иһэ-иһэ, кэпсэтэ тураллар.

оржанка

Дьокуускай биир киин болуоссата – Орджоникидзе. Суол сабыллан, чуумпу соҕус. Орто саастаах дьон оҕолорун кытта күүлэйдии, хаама сылдьаллар. Ыскамыайкаларга олорор оҕолор, тугу эрэ кэпсэтэ-кэпсэтэ, аргыый күлсэллэрэ иһиллэр.

Хомсомуол болуоссатын түүҥҥү бириэмэҕэ саппыт буоланнар, массыыналаах дьон “Айсберг” утары баар массыына тохтуур сиригэр мустар буолбуттар. Түүн ортото ааста эрээри, киһи син биир элбэх.

айсберг

“Ураса молл” диэн маҕаһыын утары, “Якутск” сурук таһыгар саҥа улахан искибиэргэ, дьон баара буолуо диэн тиийбиппит 1-2 эрэ киһи хаамса сылдьар. Хата, олох тугу да көрбөккө барыахпытын улахан тыастаах-уустаах матасыыкыллаах киһи кэлэн тохтоото. Кыыстаах уол иккиэлэр эбит. Түүҥҥү куорат устун матасыыкылынан айанныыр ураты арамаантыкалаах бөҕө буоллаҕа!

мотоциклураса мол сквер 1

Дьэ ити курдук, Дьокуускай куорат олохтоохторо киэһээҥҥи, түүҥҥү сөрүүн салгыҥҥа ким хайдах сатыырынан, сөбүлүүрүнэн сынньанар эбит диэн түмүккэ кэллибит.

Арина СТРУЧКОВА.

Тарҕат:

Санааҕын суруй

Бүтэһик сонуннар