Ахсынньы 22 күнүгэр, "Сардаана" оҕону сайыннарар киин итиэннэ "Кэскил" психолого-медико-социальнай арыаллааһын киинэ саҥа дьиэҕэ киирэр үөрүүлээх тэрээһиннэрэ ыытылынна.
"Сардаана" уһуйаан иитиллээчилэрэ уонна кэлэктиибэ 1967 сыллардааҕы тутуулаах мас дьиэттэн, оттон “Кэскил” психолого-медико-социальнай арыаллааһын киинэ 1996 сылга тэриллиэҕиттэн көһө сылдьан үлэлээн быйыл икки этээстээх, таас, толору хааччыллыылаах саҥа дьиэҕэ көстүлэр. Майабыт хабыллар хаба ортотугар турар Сыроватскай аатынан уулуссаҕа 29 сыл анараа өттүгэр “Универмаг” быһыытынан тутуллубут дьиэ саҥалыы тыыннанан оҕо чугдаарар саҥатынан туолан, дьолу-саргыны түстүө.
Майабыт баһылыга Дмитрий Тихонов бары үлэһиттэри, иитиллээччилэри уонна төрөппүттэри үөрүүлээх, күүтүүлээх түгэн үүммүтүнэн эҕэрдэлээтэ. Кэнчээри ыччаттарбыт сайдыылаах, билиилээх-көрүүлээх дьон буола иитиллэн тахсалларыгар уһуйаан, киин аныгы ирдэбилгэ толору эппиэттиир усулуобуйалаах саҥа дьиэлэнэн үлэҕит өссө таһаарыылаах, ситиһиилээх буоларыгар олук буолуоҕа диэн эттэ.
Оҕолорго, уһуйааччыларга, бары өттүнэн табыгастаах, киэҥ-куоҥ, сып сырдык дьиэҕэ айымньылаах үлэни, ситиһиилэри, дьолу баҕарабыт!