Кыаммат, татым үптээх-астаах ыаллар оскуола дьаһалтатыгар сайабылыанньа суруйан, ыраахтан үөрэх кэмигэр ноутбуктары, планшеттары, наушниктары уларсыахтарын сөп.
“Оскуолалар дьиэттэн үөрэх кэмигэр үөһэ ыйыллыбыт тиэхиньикэни анал пуондаларыттан уларсыахтарын сөп. Арай, төрөппүт сайабылыанньа уонна тиэхиньикэни ылбытын туһунан араспыыска суруйуохтаах,” – диэн СӨ Үөрэҕин министиэристибэтэ иһитиннэрэр.
Министиэристибэ этэринэн, бүгүҥҥү туругунан, интэринээт-оскуолалартан оҕо дьиэтигэр тахсара көҥүллэммэт. Төрөппүт анаан сайабылыанньа суруйар эрэ түгэнигэр барыан сөп. Ол гынан баран, төттөрү киирэригэр булгуччу хоруона анаалыһын туттарар.
Орто анал үөрэх кыһалара сирэй уонна кэтэхтэн үөрэнэ олороллор. Үөрэх хайдах быһыылаахтык тэриллэрин, хамсык балаһыанньатыттан көрөн, тэрилтэ салалтата бэйэтэ быһаарар.
“Кылаас 20 бырыһыана ОРВИлаатаҕына, кирииптээтэҕинэ эбэтэр биир эмэ оҕо хоруонаҕа сыһыннаҕына, тэрилтэ салалтата тута Роспотребнадзорга биллэриэхтээх”, – диэн иһитиннэриигэ суруйаллар.
