“АЛРОСА” хампаанньа социальнай эйгэҕэ, ол иһигэр үүнэр көлүөнэҕэ анаммыт инфраструктураны сайыннарыыга, төһүү болҕомтотун уурар. Олохтоох бүддьүөккэ нолуогу уонна дивидени киллэрэрин таһынан социальнай бырайыактарга сыллата 10-нуу млрд солк. быһа угар.
Үбүлүөйдээх сылга оҕолорго элбэҕи оҥордо. Сунтаар Кириэстээҕэр АЛРОСА дивиденигэр тутуллубут 2700 кв. м иэннээх, 120 миэстэлээх оскуола үлэҕэ киирдэ. Оскуолаҕа успуорт саалата, аактабай, ааҕар саалалаах бибилэтиэкэ, остолобуой үлэлиир.
Алексей Дьячковскай: «Саҥа оскуола, дьыссаат аһыллыыта хаһан баҕарар үөрүүлээх. Оттон тыа сиригэр тутуу дьэндэйиитэ бэйэтэ бырааһынньык тэҥэ. Биһиги хампаанньабыт маннык, баар инфраструктураны тупсарар, Саха сирин оҕолоро сөптөөх үөрэҕи ылалларыгар көмөлөһөр бырайыактарга кыттарга улахан суолтаны уурар», – диэн бэлиэтээтэ.
Судаарыстыбаннас күнүгэр Ньурбаҕа 360 миэстэлээх оскуоланы тутуу саҕаланыа. АЛРОСА уонна Ньурба оройуона бииргэ үлэлэһиигэ түһэрсибит сөбүлэҥнэрин чэрчитинэн тутуллар.
Алмаас хампаанньатын үгүс бырайыага Үүнэр көлүөнэ тус сыаллаах пуондатын кытта бииргэ үлэлэһии чэрчитинэн туолар. Пуонданы үбүнэн-харчынан өйөөһүн – АЛРОСА дьарыктанар бөдөҥ социальнай бырайыактарыттан биирдэстэрэ.
2012-2022 сылларга АЛРОСА үп көрөн, Саха сирин араас муннуктарыгар 40-тан тахса социальнай эбийиэк эбилиннэ. Х-р, Хаандыгатааҕы Оҕо эстетическэй киинигэр күн бүгүн 169 оҕо үөрэнэ сылдьар. Амматааҕы Оҕо ускуустубатын киинигэр – 326 оҕо дьарыктанар, Чурапчыга өрөспүүбүлүкэтээҕи спорт оскуолатыгар Саха сирин 28 араас оройуонуттан 428 спортсмен үөрэнэр. Абыйга уонна Элгээйигэ 365 оҕо эмиэ алмаас үбүгэр тутуллубут оскуолаҕа үөрэнэллэр. Ити курдук, АЛРОСА үбүгэр тутуллубут култуура дыбарыастарыгар, оскуолаларга, успуорт холбоһуктарга өрөспүүбүлүкэ талааннаах оҕолоро муусуканан, ырыанан, успуордунан сөбүлээн дьарыктаналлар. Күннэтэ тыһыынчанан оҕо саҥа билиини сомсор.
Былырыын АЛРОСА Үүнэр көлүөнэ пуондатын кытта биир сүҥкэн бырайыакка ылсан, Дьокуускайга үүнэр көлүөнэ пааркатын тутуу үлэтэ саҕаламмыта. Бу туонаҕа тутуллар сылаас дьиэҕэ уонна тас өттүгэр сылы эргиччи үлэлиир туһалаах сынньалаҥ паарката түстэниэ. Оҕо дьону айымньылаах үлэҕэ, бүгүҥҥү уларыйа-тэлэрийэ тутар олоххо бэлэмнээх, уустугу ааһа үөрүйэхтээх буоларга уһуйуохтара. 2 гааттан кэҥэс пааркаҕа баҕалаах барыта, доруобуйаларынан хааччахтаах оҕолор кытта, сынньанар, аралдьыйар буолуохтара.
Быыстапкалар, коворкиннар, эбии үөрэхтээһин оскуолалара, стартапка ылсарга босхо былаһааккалар, аралдьытар, сайыннарар, дьаарбайар, успуордунан дьарыктанар зоналар олохтонуохтара.
Онуоха аныгы технологиялаах килиимэти сылытар тиһиктэри туһанан, дьыл ханнык баҕарар кэмигэр дьарыктанар усулуобуйа оҥоһуллуо.
«Манна Ыччат киинэ дьэндэйиэ, онно бырайыактыыр үлэҕэ, сыыппара технологиятыгар, урбаанынан дьарыктанарга, быһата, XXI үйэҕэ ирдэнэр идэлэргэ бэлэмнээн, олох олорууга туһалаах үөрүйэххэ, сатабылга үөрэтиэхтэрэ.
Быһата, оҕо лиичинэс быһыытынан сайдарыгар көмөлөөх үөрэтии кластера буолуоҕа. Ол курдук, араас тэрээһин-быраап көрүҥэр үөрэтэр эгэлгэ тэрээһиннэри, дьарыктары былаанныыбыт. Ол иһигэр IT-технология туттуллар медиаттан, дизайнтан саҕалаан аһылык индустриятыгар тиийэ араас хайысхалар баар буолуохтара. Мин бу тустаах бырайыак өрөспүүбүлүкэ күрэстэһэр кыаҕын улаатыннарар биир төһүү чахчыта буолар, тохтобула суох креативнай экэниэмикэни сайыннарарга тирэх усулуобуйа буоларыгар эрэллээхпин», – диэн, Үүнэр көлүөнэ тус сыаллаах пуондатын генеральнай дириэктэрэ Владимир Егоров мээнэҕэ эппэт.
Күн бүгүн пуонда бу үөрэх туонатын ис хоһоонун бэлэмнииргэ күүскэ үлэлэһэ сылдьар. Паарка тэрийээччилэрэ оҕолорго дьиҥ олоххо наадалаах, көдьүүстээх бырайыактары оҥорууга үлэлэһэллэр. Билигин пуонда үөрэтэр куурустарыгар көхтөөхтүк кытта сылдьааччылар паарка тутаах дьарыктанааччылара буолуохтара. Оҕолор интэриэстэрин сыныйан үөрэтэллэр. Ол үөрэх кластерын ис хоһоонун торумнуурга учуоттаныа.
Паарка кэккэ бырагыраамаларын үлэтэ саҕаланан, балай эмэ ситиһиилэннилэр. Билигин дьарыктана сылдьар 150 оҕоттон сорохторо илэ кэлэн, атыттара онлайн-формакка үөрэнэллэр. Кинилэри “блэк-формат” үөрэҕин бараллар, ол аата, кинилэргэ биидьийэ уруоктары ыыталлар, хас күн аайы сорудах биэрэллэр. Иҥэриммит билиилэрин быраактыкаҕа көрдөрөн, оҕолор араас трениннэргэ дьарыктаналлар. Манна оҕону кытта үлэлии үөрүйэх, баай уопуттаах, үрдүк кылаастаах исписэлиистэр, тириэньэрдэр, педагогтар уонна уйулҕа үөрэхтээхтэрэ талыллан үлэлииллэр.
Паарка сорох бырагыраамаларын сороҕун билиһиннэрэбит:
«Proskills Yakutia» оскуола «Proдвижение бренда» бырагыраамата
Бу бырагыраама аныгы медиа-индустрия тутаах тирэхтэрин биэрэр: маркетинг, хаартыскаҕа түһэрии, биидьийэҕэ устуу, SMM, дизайн, анимация, араатардыыр ускуустуба сатабылыгар үөрэтэр. Бу манна үөрэтии «Сообщество фотографов, видео-операторов и специалистов в сфере медиаискусства и медиаиндустрии» ЯРОО кыттыылаах барар. Былырыын финалга 40-тан тахса үөрэнээччилэр тиийэн KYN, «Якутия» ҮАПК, «Чороон 21-й век» уонна «Триумф» СК Саха сирин бреннэрин киэҥник тарҕатыыга кейстэри бэлэмнээн көрдөрбүттэрэ.
«Биһиги иитиллээччилэрбит медиа эйгэтигэр дьиҥ баарга, олоххо туһалыыр үөрүйэҕи, сатабылы иҥэриннилэр. Оҕолоро хаартыска уонна биидьийэ контеннарын оҥоруу тирэхтэрин өйдүүллэригэр кыһанным. Оччотугар кинилэр бэйэлэрэ айымньылаах бородуукталары айан-тутан таһаарар кыахтаналлар. «Proskills Yakutia» оскуола 1-кы кууруһа кылгас кэмҥэ ситиһиилээхтик ааста, салгыы сайыннарар былааннаахпын», – диир, Саха сирин фотографтарын уонна биидьийэ-эпэрээтэрдэрин идэлээх түмсүүтүн бэрэссэдээтэлэ Алексей Павлов.
«Мини-шеф» кулинардар куурустара
Кулинария хайысхалаах үөрэтии саҥа бырагырааматын Үүнэр көлүөнэ паарката «FoodLife» диэн кулинария устуудьуйатын кыттан саҕалаабыта. Аатырбыт шеф-повардар кыһамньылаах салайыыларынан оҕолор астыырга үөрэннилэр.
Шеф-пуобар Уйгулан Мандаров оҕолору кытта аан бастакы үлэлэһиитэ.
«Биһиги кууруспут олус бэһиэлэйдик ааспыта. Оҕолор интэриэстэрэ улахан этэ. Мин кинилэри хайдах астыырга эрэ үөрэппитим, түөрүйэни эмиэ таарыйда, дьиҥнээх кулинар ас туһунан барытын билиэх кэриҥнээх! Сүрүннээн, астааһын төрүттэрин быһаарарга дьулуһабын, тоҕо диэтэххэ, ырысыабы туһанан ким баҕарар астыан сөп. Оттон саамай сүрүнэ – билиини уонна сатабылы иҥэрии буолар”, – диэн, тус санаатын Уйгулан Мандаров үллэстэр.
Куурус кэмигэр кулинария ускуустубатын 50-ча оҕо билистэ. Тэрийээччилэр уонна преподавателлэр биһиги оҕолорбут аан дойду таһымнаах “мишленовскай шефкэ” тиийэ үүнэр кыахтаахтар диэн бигэ эрэллээхтэр.
Оскуола үөрэнээччилэригэр «Твой старт» биисинэс-акселератор
Никита Кузьмин уонна Олег Ши-Бао-Хен төрөппүттэр оҕолорун илдьэргэ-аҕаларга бастайааннай суоппары булалларыгар көмөлөөх анал саайты оҥорорго быһаарбыттар. «Халлааммыт олус тымныы, онон, оскуола үөрэнээччилэригэр кэлэллэригэр-баралларыгар судургута суох, төрөппүт үксэ күн солото суох буолар, такси – сыаналаах. Онон, оҕону оскуолаҕа таһар биир бастайааннай уонна оҕоҕо кутталы үөскэппэт, эрэллээх таксины булбут көнө», – дэһэллэр уолаттар.
Бу уонна да атын идеялары оҕолор эрдэҕэс оҕолорго аналлаах биисинэс-акселератора кэмигэр бэйэлэрэ толкуйдаан, “Твой старт” диэни айан-тутан таһаарбыттар. Бу – үүнэр көлүөнэ пааркатын иһинэн, Саха сирин үөрэнээччилэригэр анаан, кинилэргэ креативнай үөрүйэҕи сайыннарарга анаан оҥоһуллубут босхо бырагыраама. Тэрийээччилэр – Үүнэр көлүөнэ пуондата, Глобальнай биисинэс оскуолата уонна «detiMBA» диэн тинейджердэр Норуоттар икки ардыларынааҕы биисинэс –оскуолалара.
Үс ый устата оҕолор биисинэс тирэнэр тирэҕин үөрэттилэр, эспиэрдэри кытта инновациялаах бырайыактарын торумнаатылар. Бырагыраама кыттааччыларын түмүк бырайыактарын «Якутия» Венчурнай хампаанньа уонна «Саха Өрөспүүбүлүкэтин сайыннарыы корпорацията” АУо-лар, «Edudo», «Emerging Europe Awards», «Рамблер», «TTM Mobile» уонна «HRM» биллэр-көстөр стартаптар уонна бырайыактар бэрэстэбиитэллэрэ сыаналаатылар. Үлэлэри билиһиннэрии, көмүскээһин кэнниттэн бастыҥ бырайыактары талан, менторскай арыаллааһын диэн тэрилиннэ. Оттон сорох оҕолорго бииргэ үлэлэһэргэ тиийэ этиилэр киирдилэр.
«Hlop job» хамаанда лиидэрэ Айдын Сидоровка биһиэхэ стажировкаланарыгар уонна бырайыагы киэҥник тарҕатыыга бэйэтин көрүүтүн үллэстэригэр этии киллэрбиппит. Обургу оҕолору үлэнэн хааччыйыы туһунан бырайыактара олус интэриэһинэй, бу боппуруоска оҕолорго бэркэ диэн бэркэ быһаарсаллара көстөр. Ону таһынан сорох хамаандалары упаковка бырайыагар көмөлөөх буоллун диэн, стартап биллиилээх төрүттээччилэрин кытта билиһиннэриэхпит», – диэн, «Якутия» венчурнай хампаанньа» АУо генеральнай дириэктэрэ Василий Ефимов кэпсиир.
Оҕолорго уонна эрдэҕэс оҕолорго аналлаах «Skills Park» үөрэх
Оҕо лиидэр буоларыгар, уратытык (креативнайдык) толкуйдуурга, кириитикэлии толкуйга, эмоциональнай интеллеккэ, тайм-менеджмеҥҥэ, элбэх дьон иннигэр сатаан тыл этэргэ, бэйэни билэ үөрэнэргэ туһуламмыт саҥа бырайыак быйыл муус устарга саҕаламмыта.
“АЛРОСА” хампаанньа уонна СӨ Үүнэр көлүөнэтус сыаллаах пуондатын пресс-сулууспалара.
