Гос Дуума бэҕэһээ төрөөбүт тыллары оскуолаҕа үөрэтии туһунан сокуон барылын бастакы ааҕыыга ылынна. Дуума Үөрэххэ, билимҥэ профильнай кэмитиэтэ сокуон барылын иккис ааҕыыга улаханнык уларытарга этии киллэрбит.
Кэмитиэт бэрэссэдээтэлэ Вячеслав Никонов эрдэ “оннооҕор сокуон барылын билиҥҥи барыйаана төрөөбүт тыллары үөрэтии үөрэх бырагырааматыгар факультатив чааһыгар буолбакка, хайаан да булгуччулаах чааһыгар баар диэн, ону икис ааҕыыга оннунан хаалларыахпыт” диэн бэлиэтээбитэ.
Бэҕэһээ сокуон барылын көрөллөрүгэр иккис ааҕыыга ылынар уларытыыларын туһунан эттилэр. Онно национальнай тыллары өйүүр Пуонданы тэрийэргэ эттилэр. Бу Пуонда төрөөбүт тыллары чинчийэргэ көмөлөһүөҕэ, үөрэх учуобунньуктарын, босуобуйалары таһаарыаҕа, үөрэтии методикатын оҥоруоҕа, учуобунньуктары эспэртиисэлиэҕэ уо.д.а. бу эйгэҕэ үлэни ыытыаҕа дииллэр. Маны таһынан, сокуоҥҥа туора тылы (неродной) талан ылар эрэ курдук (булгуччу буолбакка) үөрэтэр быраабы киллэрэллэригэр эттилэр.
Маны таһынан, сокуон барылыгар нуучча тылын эмиэ төрөөбүт тылга тэҥнээн биэрэллэригэр эттилэр. Билигин нуучча тыла судаарыстыбаннай тыл быһыытынан үөрэтиллэр да, төрөөбүт тыллар испииһэктэригэр киирсибэт эбит. Маны таһынан, өрөспүүбүлүкэлэр судаарыстыбаннай тылларын төрөппүт (сокуоннай бэрэстэбиитэл) оҕото үөрэтэрин дуу, үөрэппэтин дуу бэйэтэ билэр буолуоҕа. Онуоха хайаан да сайабылыанньа биэрэр буолуохтара. Вячеслав Никонов этэринэн, төрөппүттэр оҕолоро бастакы уонна бэһис кылаастарга киирэллэригэр маннык сайабылыанньаны биэрэр буолуохтара үһү.
