РФ Оборуонатын министиэристибэтэ “дойдуга байыаннай балаһыанньа биллэриллэр түгэнигэр, Арассыыйа олохтоохторун массыыналарын аармыйа туһатыгар быһа тутан ылар туһугар учуот ыытарын” туһунан этии киллэрдэ.
Билигин бу бирикээс барыла биэдэмистибэлэр икки ардыларыгар сөбүлэһиигэ, хоруупсуйаны утары эспэртиисэҕэ көрүллэ сылдьар. Байыаннай биэдэмистибэ боростуой, кыра массыыналарга буобакка, УАЗ-469, УАЗ-3151, УАЗ-2966, УАЗ-3163 («Патриот») курдук Арассыыйаҕа бэйэтигэр оҥоһуллубут массыыналарга наадыйыан сөп үһү. “Иномаркалартан”, сүрүннээн, Toyota Prado уонна VW Touareg курдук массыыналар учуокка ылыллыахтара. Массыыналаах дьон үөрүөхтэрин сөп, ол былдьаан ылыллыбыт массыыналар уоттаах сэрии бара турар сиригэр ыытыллыбаттар уонна букатыннаахтык ылыллыбаттар. Аармыйа бэйэтин кыһалҕатын хааччыйар байыаннай тиэхиньикэ көһүннэҕинэ, бу массыыналары сокуоннай хаһаайыннарыгар төнүннэриэхтэрэ, туһаммыттарын иһин соболоҥ харчы төлүөхтэрэ.
Оттон “сэрии буолуор диэри” ол байыаннай учуокка хабыллыбыт “УАЗиктар” быһаччы хонтуруолга сылдьыахтара.
