Сунтаар улууһун Бүлүүчээн нэһилиэгэр искэн ыарыылара кэнники уон сылга улааппата диэн Саха сирин доруобуйаҕа харыстабылын министиэристибэтэ иһитиннэрэр.
“Дьокуускайдааҕы өрөспүүбүлүкэ онкологическай диспансерын канцер-регистрын дааннайдара көрдөрөрүнэн, Сунтаар улууһун Бүлүүчээн нэһилиэгэр бүтэһик биэс сылга искэн ыарыытыттан 3 киһи өлбүт. Кэнники уон сыллааҕы кэтээн көрүүгэ искэн ыарыылара бу нэһилиэккэ улааппатах”, - диэн СӨ Доруобуйа харыстабылын министиэристибэтин официальнай саайтыгар иһитиннэрэллэр.
Инньэ гынан, ыстатыыстыка дааннайдарыгар сигэнэн, Бүлүүчээҥҥэ искэн ыарыытын көрөдрүүтэ “стабильнай” диэн буолбут.
Ааспыт сылга Саха сиригэр 100 тыһ. нэһилиэнньэҕэ искэн ыарыытын көрдөрүүтэ 259,4 тэҥнэспит. Ити – Арассыыйа таһымыгар 38,4%-нан намыһах. Оттон искэн ыарыытыттан өлүү 100 тыһ. нэһилиэнньэҕэ 134,6 тэҥнэспит, ол эбэтэр дойду таһымыгар 32,9 кыра.
Санатар буоллахха, аҕыйах хонуктаахха Бүлүү уута сүһүрбүтүгэр, Бүлүүчээн олохтоохторо "кэнники сылларга искэн ыарыыта олус дэлэйдэ" диэн аймаммыттара.
