Былыр-былыргыттан саха норуота ыарахан кэмҥэ бэйэ-бэйэбитигэр биир сомоҕо курдук көмөлөһөн, баччааҥҥы диэри омук быһыытынан ордон кэллэхпит. Сааскы халаантан Саха сирэ элбэхтэ эмсэҕэлээн кэллэ. Онуоха халаан содулун туоратыыга олохтоохтор күүскэ түмсэн, кыһалҕалаахтарга көмөлөһөр үтүө үгэстэннибит.
Балаҕан ыйын 4 күнүгэр «Ситим» медиа-бөлөх дьиэтигэр халаан уутуттан эмсэҕэлээбит улуустарга көмө туттарыытын иккис чааһа буолан ааста. Быйылгы халааҥҥа Уус Майда, Амма, Чурапчы, Таатта, Мэҥэ Хаҥалас, Хаҥалас уонна Орто Халыма улуустара эмсэҕэлээтилэр.
Ол курдук биирдиилээн тэрилтэлэр, өрөспүүбүлүкэ олохтоохторо аһыныгас сүрэхтэринэн норуот хаһыата “Кыым” тэрийбит көмө аахсыйатыгар көхтөөхтүк кытыннылар. Ууга барбыт улуус, нэһилиэк бэрэстэбиитэллэригэр «Кыым» хаһыат эрэдээктэрэ Иван Гаврильев, «Ситим» медиа-бөлөх генеральнай дириэктэрин солбуйааччыта Владимир Степанов, «Аврора» медицинскэй килииникэ дириэктэрэ Светлана Яковлева аахсыйа чэрчитинэн хомуллубут көмөнү туттартаатылар. «Ситим» медиа-бөлөх генеральнай дириэктэрэ Мария Христофорова халаан уутугар эмсэҕэлээччилэригэр баҕа санаатынан тэрээһин түмүктэннэ.
Амма улууһун Абаҕа нэһилиэгин элбэх оҕолоох ыалыгар ырыаһыт Светлана Колесова - Сатабыл көмө оҥордо.
Уус Алдан Чэриктэйигэр уугу барбыттарга СӨ Үтүөлээх артыыһа Анастасия Готовцева анаабыт көмөтө нэһилиэк бэрэстэбиитэлигэр туттарылынна.
Амма нэһилиэгин олохтооҕор Дьокуускай куорат биэнсийэлээҕиттэн Мария Гороховаттан көмө көрүлүннэ.
Орто Халыма улууһун бэрэстэбиитэллэригэр СӨ Үтүөлээх артыыстара Сахаайа уонна Александр Бурнашевтар, Дьокуускай куорат олохтооҕо Дмитрий Сергеев көмөлөрө туттарылынна.
Ырыаһыт Светлана Бугаева, пенсионер Роберт Донской, Дьокуускай куорат олохтооҕо Анна Гоголева, пенсионер Валерий Попов, үҥкүү тыйаатырын артыыһа Дмитрий Артемьев оҥорбут көмөлөрүн Уус Майа улууһун бэрэстэбиитэллэригэр Владимир Степанов туттарда.
Климентий Корякин диэн биэнсийэлээх көмөтүн Амма Промкомбинатын бэрэстэбиилэригэр туттардылар.
Таатта улууһун Чымнаайытыгар «Аврора» медицина килииникэтин көмөтө нэһилиэк баһылыгар туттарылынна.
Санатан эттэххэ, «Норуот күүһэ – көмүөл күүһэ» аахсыйа өссө саҥа дьылга диэри салҕанар, халаан уутуттан эмсэҕэлээбит дьоҥҥо саҥа, ыраас малы-салы, аһы-үөлү, таҥаһы-сабы хомуйууга эрэдээксийэҕэ аҕалан туттарыаххытын сөп.
