Балаҕан ыйын 22 күнүгэр үгэскэ кубулуйбут билим бэстибээлэ алтыс төгүлүн ыытыллыаҕа. Быйылгы бэстибээл “Россия – Моя история” историческай пааркаҕа буолуоҕа.
Бэстибээлгэ билим саҥа арыйыыларын кытары билиһиннэрэллэр. Тэрийээччилэр – ХИФУ билим-чинчийэр үлэлэрин Управлениета бэлиэтииринэн, сыллата бэстибээли сэҥээрээччи ахсаана эбиллэ турар.
Быйылгы бэстибээлгэ үрдүк үөрэх кыһалара, өрөспүүбүлүкэ билим уонна үөрэтэр тэрилтэлэрэ кыттыахтара. Уопсайа 130-тан тахса экспозиция көрдөрүүгэ туруоҕа. ХИФУ УНИР устудьуоннар, эдэр учуонайдар уонна исписэлиистэр билим-чинчийэр үлэлэрин тэрийэр отдел начаалынньыга Нинель Малышева этэринэн, быйылгы бэстибээл экспозициялара олус киэҥнэр, аныгы наука сайдарын кэрэһэлииллэр. Инньэ гынан, бэстибээлгэ кэлбит хас биирдии киһи хайаан даҕаны бэйэтин сэҥээрэр экспозициятын булуоҕа.