Покровскай куоракка саҥа оскуоланы тутуу түмүктэнэн эрэр диэн Саха сирин тутууга министиэристибэтин пресс-сулууспата иһитиннэрэр. 3-с №-дээх саҥа таас оскуола 350 миэстэлээх.
“Күн бүгүн саҥа оскуоланы тутуу 87% ситтэ. Эбийиэккэ ис үлэ түмүктэнэн эрэр, бу күннэргэ исписэлиистэр саҥа миэбэли таҥан туруоруохтара. Үс мэндиэмэннэх таас оскуолаҕа үөрэнэр кэбиниэттэр, успуорт уонна аактабай саала, бибилэтиэкэ, оскуолатааҕы түмэл, көмпүүтэр кылааһа, таҥас ыйыыр сир, остолобуой уонна аныглыы пищеблок баар. “Уран” дизайн-устуудуйа үлэһиттэрэ оскуола көстүүтүн тупсараллар”, — диэн министиэристибэҕэ иһитиннэрдилэр.
Маны таһынан, саҥа оскуолаҕа доруобуйаларынан хааччахтаах оҕолор үөрэнэллэригэр анаан сөптөөх усулуобуйа тэриллбит: киирэр ааҥҥа анал пандус ууруллубут, оскуолаҕа лифт үлэлиир, итиэннэ аналлаах киэҥ-куоҥ санузел туруоруллубут.
Сакаасчытынан “СӨ судаарыстыбаннай сакаасчытын Сулууспата” ГКУ, оттон сүрүн бэдэрээччитинэн “Якутцемент” АУо буолбуттар.
