Балаҕан ыйын 27 күнүгэр, ол эбэтэр чэппиэргэ, Мииринэй оройуонун дьаһалтатыгар “Саха сирин тыыннаах алмаастара” айылҕа пааркатын саҥа миэстэтин быһаарыы туһунан аһаҕас кэпсэтии буолуохтаах. Гаас уонна ниэп тэрилтэлэриттэн биирдэстэрэ ООО «СюльдюкарНефтеГаз» Мииринэйтэн букатын чугас сирдэргэ углеводород баай сырьетын булан турар.

Тоҕо мантан ким да дьиксиммэтий? Тоҕо ким да утарбатый? Мииринэй уопсастыбаннаһа ниэп-гаас тэрилтэтэ куораттан уонча биэрэстэлээх сиргэ кэлиитин ылыммат. Эксплоразведка ньыматынан скважина хаһыахтаах сирдэрэ “Саха сирин тыыннаах алмаастара” пааркатын миэстэтигэр баар буолуохтаах. Олохтоохтор бу быһаарыыны ыараханнык ылыннылар.

Арҕаа «Роснефть», хоту “РНГ”, соҕуруу “Газпром” уонна «Сургутнефтегаз», илин «ИНК» хампаанньалар хаһаайынныыллар. Арыый да табыгастаах, чуумпу миэстэни булбут айылҕа пааркатын көһөрөр буоллулар. Мииринэйдэр хаарыан сирбититтэн матан эрэбит.

2009 сыллаахха 32,105 гектар иэннээх тыаҕа Саха сирин Айылҕатын харыстабылын министиэристибэтэ уонна АЛРОСА хампаанньа аһаҕас халлаан анныгар зоопаарка тэрийэн тураллар. Бу диэки салгынныын да ыраас. Кылыгырыы сүүрдэр таас үрэхтэрдээх, киэҥ нэлэмэн күөллээх. Тайах аһыы киирэр айааннардаах айылҕа пааркатын туппуттара уон сыл буолла. Күрүөлэрэ-хаһаалара бигэ оҥоһуулаах.

Айылҕа зоопааркатыгар, овцебыгы, кулааhайы, Уһук Илин табатын (пятнистый олень), тайаҕы, дьиэ табатын, сылгыны, ягы, дьиэ табатын, эhэни, улары, холуубу, павлины - барыта сэттэ уонча кэриҥэ кыылы уонна көтөрү ханна көһөрөллөр?

Мииринэй олохтоохторо сөтүөлүүр, сыламныыр Чуоналыыр күөллэрэ, «Олоҥхо дойдута» ландшафтнай-этнографическэй тиһигэ, «Алмазная долина» хайыhар баазата паарканы кытары сэргэстэһэ сыталлар.

Аан айылҕабыт ниэп-гаас сайдарын туһугар маннык дьылҕаламмыта хомолтолоох. Былаас «Саха сирин тыыннаах алмаастара» паарканы атын сиргэ көhөрөн илдьэригэр нэһилиэнньэ сөбүлэҥин ылыахтаах этэ. Мииринэй уопсастыбаннаһа былаас маннык дьайыыларын кытары сөпсөспөт. Ону аахса даҕаны барбатылар. Дьэ, сүрдээх дьыала!

Станислав Алексеев,

Мииринэй куорат