Ол быһыытынан Арассыыйаҕа бу дьыл алтынньы 16 – 31 күннэригэр анал үөрэтиини ааспыт биэрэпис оҥорооччулар дьон олорор дьиэлэрин кэрийэн, нэһилиэнньэҕэ ыйытык оҥорон эрэллэр. Маннык биэрэпис дойдуну барытын хаппат. Пилотнай дэнэр – Камчатка биэрэгэр, Командор арыытыттан саҕалаан Улуу Новгородка диэри, ону таһынан Санкт-Петербург куораттан Приэльбрусьяҕа диэри – уопсайа уон оройуону талбыттар. ППН-2018 кыттааччылары таларга кыалларынан социальнай-демографическай өттүнэн араас туруктаах эрэгийиэннэри хабарга дьулуспуттар. Холобур, Сахалинтан Соҕуруу Курильскайы, Краснояр кыраайыттан Минусинскай куораты, Санкт-Петербуртан Княжево уокуругун. Оттон Саха сириттэн Хаҥалас улууһа хапсара быһаарыллыбыт. Бу туһунан СИА суруйар.
2018 сыллааҕы боруобалыыр биэрэпис (ППН-2018) иккис түһүмэҕэ – Арассыыйа устуоруйатыгар муҥутуур киэҥ иэннээҕэ. Онно ити этиллэр 10 пилотнай оройуонтан уопсайа 550 тыһ. тахса киһи (респондент) хабыллыахтаах. Тэҥниир буоллахха, 2008 сыллааҕы боруобалыыр биэрэпискэ дойду үс эрэгийиэниттэн 300 тыһ. тиийбэт респондент хабыллыбыта.
Биэрэпис бастакы түһүмэҕэ алтынньы 1—10 күннэригэр буолбута. Онно дойду ханнык баҕарар олохтооҕо баҕа өттүнэн судаарыстыба өҥөтүн Кэлим порталыгар киирэн, интэриниэт-биэрэпискэ кыттар усулуобуйата оҥоһуллубута. Иккис түһүмэххэ онно хапсыбатах дьону хабыахтара.
Алтынньы 16 – 27 күннэригэр биэрэпис оҥорооччулар сылдьыахтаах, кыбартыыраларын 100 % хабар соруктаахтар. Оттон алтынньы 28-31 күннэригэр, онтон 10 %-нын талан, хонтуруолунай кэрийиини оҥоруохтара. Ону тэҥэ тустаах сир олохтоохторо биэрэпистиир учаастакка бэйэлэрэ кэлэн бэлиэтэтиэхтэрин сөп.
Быйылгы биэрэпис уратыта интэриниэт-биэрэпис ыытыллыбыта уонна биэрэпис оҥорооччулар планшеттаах сылдьыылара буолар.
