Уопсай быһаарыныы кэннэ, Саха сирин 162 нэһилиэгэ арыгы атыыланарын утардылар. Бу нэһилиэктэргэ, уопсайа, 85378 киһи олорор. Бу туһунан арыгы ырыынагын хонтуруоллуур судаарыстыбаннай управление салайааччыта Матвей Лыткин иһитиннэрэр.
Матвей Лыткин “сотору кэминэн арыгы атыытыттан өссө 12 нэһилиэк батыныаҕа, инньэ гынан уопсайа 174 “испэт” нэһилиэк баар буолуоҕа” диир.
Кини бэлиэтииринэн, туох баар социальнай кыһалҕа дьон арыгы иһэриттэн тахсарын элбэх баһылык өйдүүр буолла. Инньэ гынан, арыгыттан аккаастанар нэһилиэк ахсаана хаҥыы турар. Маннык быһаарыныыны ылыммыт нэһилиэк талбыт суолуттан аккаастаммыта диэн суох. Олортон 5 %-на арыгыттан кыккыраччы аккаастанна, саҥа үктэлгэ таҕыста. Ааспыт сылга нэһилиэнньэ арыгыттан өлүүтэ аччаабыт (287 киһи, ити 2016 сыллааҕы көрдөрүүттэн 20 % намыһах). Маны таһынан арыгыны кытары сибээстээх ыарыы көрдөрүүтэ эмиэ намтаабыт. Итирэн баран буруйу оҥоруу өрөспүүбүлүкэҕэ 6 % кыччаабыт.
“Антиалкогольнай” сокуон Саха сиригэр Ил Дархан ыйааҕынан 2010 сыллаахха олоххо киирбитэ. Бу сокуон 2015 сыллаахха кэҥээн, бобуу өссө улааппыта.
