Ил Түмэн үһүс уочараттаах пленарнай мунньаҕа буола турар. Норуот дьокутааттара олохтоох бэйэни салайыныы сокуонугар уларытыылары киллэрэр туһунан сокуону бастакы ааҕыыга ылыннылар. Ол кэннэ Өлүөхүмэ улууһун Кыыллаах уонна Даппарай нэһилиэктэригэр арыгы атыытын бобуу туһунан сокуон барылын көрдүлэр. Сокуон барылын нэһилиэк олохтоох дьокутааттара киллэрбиттэр. Ил Түмэҥҥэ сокуон барылын Оксана Михайлова уонна Игорь Григорьев билиһиннэрдилэр. Кыыллаахха уонна Даппарайга 177 тиэргэни кэрийэ сылдьан “арыгы атыытыттан аккаастанабыт дуо?” диэн ыйыппыттарыгар сүүс бырыһыан өйөөбүттэр. Дакылааты Кыыллаах баһылыга Раиса Лавернова иһитиннэрдэ.
Санатар буоллахха, Саха сиригэр сокуонунан арыгы атыытыттан аккаастаммыт 185 нэһилиэк баар. Кыыллаахха уонна Даппарайга арыгы атыытын бобууга борокуратуура “федеральнай сокуоҥҥа сөп түбэспэт, ону көннөрүҥ” диэн этиилээх. Алексей Еремеев “бобууннан син биир арыгы ырыынагын толору хааччахтаабаккын, иһиэн баҕарбыт киһи син биир булан иһиэҕэ. Нам улууһугар 1-кы Хомустаах эрэ маннык сокуону киллэрбэккэ олорор. Улуус киинэ бэйэтин кэмигэр эмиэ маннык сокуону ылына сатаабыта да, ол билигин тохтоон турар. Улуус киинигэр арыгы атыытын боборго нэһилиэк буолбакка, оройуон дьокутааттара куоластаан ылыныахтаахтар, ону биһиги бигэргэтиэхтээхпит. Бүтүн улууска арыгы атыыта тохтоотоҕуна, ол атын өттүнэн дьайыан сөп”, - диэтэ. Маныаха Михаил Эверстов “Саха сиригэр суоллаах-иистээх киин улуустар эрэ баар буолбатахтар, Кэбээйи улууһун киинэ олох ойуччу турар. Онон маннык сокуон наада, ол кими эрэ син биир арыгы дэгиэ тыҥыраҕыттан быыһыан сөп ээ”, - диэтэ. Маны таһынан, маннык сокуону ылынар нэһилиэктэр грант харчытыгар дураһыйаары эрэ ылыналлар диэн санаа эмиэ иһилиннэ. Ольга Балабкина “бырабыыталыстыба граны баалынан көрөн биэрэр, онон итинник саныыр сыыһа” диэн быһаарда. Владимир Прокопьев сокуон олус наадалааҕын, ону ылынарга дьокутааттары ыҥырда. Кыыллаах олохтооҕо, 4 оҕолоох ийэ өссө балаҕан ыйыгар сураҕа суох сүппүтүн, биллиҥээҥи диэри көрдүүр үлэ тугу да аҕалбатаҕын, маныаха быһылаан төрүөтүнэн арыгы иһиитэ буолбутун бэлиэтээтилэр уонна кыыллаахтар бу сокуоҥҥа наадыйалларын эттилэр. Мария Христофорова “Владимир Михайлович этиитин өйүүбүн, маннык сокуон тыа сиригэр наадалаах. Нэһилиэк дьокутааттарын Сэбиэтэ иилээбит сокуонун хайаан да өйүөх тустаахпыт. Мин Набережнай уокуругум олохтоохторо арыгы атыытын хааччахтыыр баҕалаахтар. Губин уулуссатыгар турар “Свежая пенная точка” диэн түүннэри аһыы утаҕы атыылыыр туочуканы кыайбакка турабыт. Онон маныаха майгынныыр сокуон барыла куорат уокуруктарыгар эмиэ баар буолуохтаахтар ” диэн этиннэ.
Норуот дьокутааттара Кыыллаах уонна Даппарай нэһилиэктэригэр арыгы атыытын бобор туһунан сокуону 1, 2 уонна бүтэһиктээх ааҕыыга өйөөтүлэр.
