Сунтаар Кириэстээҕиттэн киһини үөрдэр сонун кэллэ.
Сунтаар улууһун дьаһалтата уонна оройуон мунньаҕын дьокутааттара саҥа сорук туруорунан, Кириэстээххэ 120 миэстэлээх орто оскуола тутуутун боппуруоһунан ыкса дьарыктанан эрэллэр.Билигин Кириэстээххэ эргэ, самнайбыт оскуолалаахтар.
Бу оскуолаҕа үгүстүк сылдьыбыт буоламмын, биллэ эргэрбитин, тэхиньиичэскэй, саньытаарынай ирдэбилгэ эппиэттээбэтин туоһулуубун. Кырдьык даҕаны, өрөспүүбүлүкэ аһаан-таҥнан олорор сүрүн салаата - алмаас кынаттаммыт сиригэр болҕомтотун уурдаҕына сиэрдээх буолсу.
Кириэстээх – Сунтаар улууһун киэн туттуута диэн дакылааттарга элбэхтик ахталлар да, дьыалатыгар күттүөннээх кылааттарын дьөрү көрбөппүн.Дьиҥэр бу - сахалар, алмааска быhаччы сыhыаннарын кэрэhэлиир сирдэринэн буолар.Ону Саха АССР, саҥа Саха сирин былаастара булгуччу толуйуохтара баара.Муҥ сатаатар, баай, модун ССРС “Якуталмаз” күннүүр-күөнэхтиир кэмнэригэр, Бүлүү өрүһү туоруур күргэ, Кириэстээхтэн Бүлүүчээҥҥэ диэри айан суол, иһэр ууну кичэйэн ыраастыыр ыстаансыйа, балыаһа туттартаан ылыа эбиттэр.Ол кэмҥэ тыллаах-өстөөх, дьирээлэһэн туран туруорсар кыахтаах көстүбэтэх муҥун!
Кириэстээххэ сэлиэнньэ олохтоохторун үгүстэрин дьиэлэрэ, тэрилтэлэр самнархайдарын туһунан этэ да барбаппын - эргэ-урба.Бу - Саха сирин салалтатын Кириэстээххэ сыhыанын бөрүкүтэ суох көстүүтэ.Дьэ, ити курдук, 900-чэ киһилээх нэhилиэк кыһалҕата, ыалдьар боппуруоһа бараммат.
Күүстээх 220 кВ уот киллэрэргэ көҥүл баара буоллар, маннааҕы ыаллар, удамыр сыаналаах элэктириичистибэттэн бэртээхэй ититиниилээх буолуо эбиттэр.
Ону баара лиинньийэҕэ төрүт чугаһаппаттар.Олохтоохтор, күүстээх уоттаах тимир лиинньийэни хартыына курдук көрө олороллор.
Кириэстээх - Сунтаар улууhун хорук тымыра, «Бүлүү» федеральнай суолталаах айан суола.
Таксыылар Сунтаар, Ньурба, Мииринэй, Айхал, Удачнай, Ленскэй, Дьокуускай диэки субуллан олороллор.Ол эрэн автосапараапка суох.Чайнойдара улахан тыалга сууллуох курдук самнархай дьиэҕэ олорор.
Ыйытык элбэх.
Ол эрэн, кэнники сылларга Сунтаар улууһун дьаһалтата, урут көйгөтүтүүгэ барбыт Кириэстээҕи өрө тардар санаалааҕын биһириибин.
Станислав Алексеев, Мииринэй куорат.
Ааптар хааартыскалара.
