“Росконтроль” туһанааччылар Сойуустарын экспертнэй киинэ “Ростест-Москва” тэрилтэни кытта сакалаат кэмпиэттэр хаачыстыбаларын чинчийэн көрдүлэр. Ол курдук, исписэлиистэр сэттэ араас сакалаат кэмпиэттэри бэрэбиэркэлээтилэр: “А.Коркунов”, “Ferrero Rocher”, “Вдохновение”, “Белочка”, “Fine Life”, “Красный Октябрь” уонна “Бабаевскай”.
Чинчийии түмүгүнэн ордук куһаҕан хаачыстыбалаах “Красный Октябрь” буолла. Бу кэмпиэттэргэ куттал суох буолуутун ирдэбиллэригэр эппиэттээбэт аһара элбэх арыылаах кислота баара билиннэ.
Ону таһынан, “Белочка” уонна “А.Коркунов” кэмпиэттэр сууларыгар састааптара ситэтэ суох суруллубута быһаарылынна. Уонна исписэлиистэр “Белочка” кэмпиэт тас көрүҥүн соччо сөбүлээбэтилэр.
Чинчийии түмүгүнэн “Ferrero Rocher”, “Вдохновение”, “Fine Life” уонна “Бабаевскай” сакалаат кэмпиэттэрэ ГОСТ бары ирдэбиллэригэр толору эппиэттииллэр.
