Сунтаарга канализация уутун ыраастыыр саҥа тутуллубут ыстаансыйаны үлэҕэ киллэрэргэ бэлэмнэнэллэр. Аныгы комплексы Ил Түмэн дьокутааттарыгар көрдөрдүлэр. Бу туһунан парламент пресс-сулууспата иһитиннэрэр.
“Бу биир сууккаҕа 200 кубометр убаҕаһы ыраастыыр аныгы комплекс буолар. Ыстаансыйа дьоҕус эрээри, кирдээх ууну 98 % ыраастыыр. Үлэлэтиитэ олус судургу, экология өттүнэн куттала суох. Тыаһа-ууһа кыра уонна сыт таһаарбат”, – диэн Сунтаар улууһун баһылыга Анатолий Григорьев иһитиннэрэр. Исписэлиистэр этэллэринэн, ыраастыыр ыстаансыйа ассенизаторскай массыыналары солбуйар кыахтаах.
