Олорор дьиэлэрин уокка былдьаппыт дьоҥҥо көмө харчы умайбыт дьиэлэрэ көтүрүллүбүтүн кэннэ биирдэ төлөнүө. Бу туһунан куораттааҕы администрация пресс-сулууспата иһитиннэрэр.
“Уокуруктааҕы администрация хамыыһыйата дьиэни көрөн баран барыллаан хаарбах туруктааҕынан ааҕар. Бэрибиэркэ аактатыгар илии баттаммытын кэннэ куорат баһылыгын дьаһалынан дьиэ официальнайдык хаарбах туруктааҕынан ааҕыллар уонна көтүрүллэр. Быстах кэмҥэ олорор дьиэни ылыыга 28 сайабылыанньа киирбитэ. Олортон 16 киһи аккаастаммыта. Хаалбыт 12 сайабылыанньаттан 8 дьиэ кэргэҥҥэ быстах кэмҥэ олорор дьиэ бэриллибитэ. Атыттар быһаарына иликтэр”, – диэн иһитиннэриигэ суруллар.
Киирбит сайабылыанньалартан биирдэ бэриллэр көмө харчыны 8 ыал ылара билиннэ. Бу күннэргэ 23 сайабылыанньаны көрүөхтэрэ. Сорохтору Росреестр барыллаан көрүө. 32 ыал олорор дьиэлэрин уокка былдьаппыта биллэр. Олор истэригэр 13 оскуола саастаах уонна 10 оскуола иннинээҕи саастаах оҕолор бааллар.
Куорат администрациятын пресс-сулууспата “Интерфакс-Дальний Восток” иһитиннэрбитинэн, куорат олохтоохторо эмсэҕэлээбит дьоҥҥо 61 тыһ 500 солк көмө харчы хомуйбуттар. Бу күҥҥэ 36 тыһ солк түҥэтиллибит.
Эрдэ суруллубутун курдук, тохсунньу 12 күнүгэр Дьокуускайга элбэх кыбартыыралаах олорор дьиэ умайбыта. Олохтоохтор быстах кэмҥэ аймахтарыгар, билэр дьонноругар тарҕаммыттара. Умайбыт дьиэҕэ 38 кыбартыыра баара. Бу дьиэҕэ официальнайдык 60 тахса киһи суруллубут. Ол эрэн элбэх кыбартыыра куортамҥа турбут буолан, олохтоохтор ахсааннара чуолкайдана илик. СӨ силиэстийэлиир хамыыһыйата процессуальнай бэрибиэркэни ыытар. Дьиэлэрин, малларын-салларын сүтэрбит дьоҥҥо көмө харчы көрүллүө. Ону таһынан, биирдэ бэриллэр көмө харчы сүтүктээх дьоҥҥо төлөнүө.
