Дьокуускай куорат хаарбах туруктаах мас дьиэлэрин баһаарынай сигналлара ый аайы бэрэбиэркэлэнэр буолуоҕа. Бу соругу куорат баһылыгын бастакы солбуйааччы Владимир Федоров, элбэх кыбартыыралаах мас дьиэлэри кэрийэн көрүү түмүгүнэн салайар хампаанньаларга уонна территориальнай дьаһайааччыларга биэрдэ. Бу туһунан мэрия пресс-сулууспата иһитиннэрэр.
Мас дьиэлэри кэрийии Сайсаар уокуругуттан саҕаланна. Манна Борисовка-1, 7 уонна 32 куорпустарыгар баһаарынай сигналлар систиэмэлэрин бэрибиэркэлээтилэр. Бастакы аадырыска сигнал буруоҕа кэмигэр үлэлээтэ уонна дьуһуурунай-диспетчерскэй сулууспаҕа билиннэ. Иккис дьиэҕэ сигнал үлэлээбэтэ. Тэрил иитэрэ бүппүтэ быһаарылынна. Строительнай уокурукка Якутская 4Б уонна 4А уулуссаҕа турар дьиэлэр сигналлара бүтүн. Олохтоохтор бэйэлэрэ туруорбуттар, тэрили дьаһайааччы хампаанньа көрөр. Салгыы Промышленнай уокурукка Рихарде Зорге уулуссаҕа турар дьиэлэри кэрийдилэр. Манна сигналлар үлэлээбэтилэр.
Владимир Федоров куорат дьаһалтата салайар хампаанньалары кытта баһаарынай сигналлары туруорууга уонна баар тэриллэри саҥардыыга үлэлиэ диэн эттэ.
