Нам улууһун киинигэр IT-киин арылынна, күһүҥҥэттэн хампаанньа саҥа дьиэҕэ көһөр былааннаах. Билигин быстах кэмҥэ улуустааҕы бизнес-инкубатор дьиэтигэр үлэлиир. Бу туһунан инновация министиэристибэтин пресс-сулууспата иһитиннэрэр.
“Билигин IT-киин улуустааҕы бизнес-инкубатор дьиэтигэр икки хоһунан, уопсайа 50 кв м иэннээх сиргэ үлэлиир. Намҥа бизнес-киин дьиэтэ тутулла турар. Онон күһүҥҥэттэн IT-киин онно көһүөҕэ”, — диэн министиэристибэ үлэһиттэрэ быһаараллар.
IT-кииҥҥэ оҕолору үөрэтиэхтэрэ, ону таһынан исписэлиистэр квалификацияларын уларытар куурустар ыытыллыахтара.
“Киин арылла илигинэ биһиэхэ дьон тэрилтэлэрин саайтын оҥоттороору ыйыталаһааччылар. Бу урбаанньыттар биир тутаах боппуруостара буолар. Манан бэйэлэрэ дьарыктанар кыахтара суох буоллаҕа дии. Оттон табаары интэриниэт нөҥүө тарҕатар быдан табыгастаах”, — диэн киин дириэктэрэ Саргылана Петрова кэпсиир.
“Биир даҕаны “оффлайн” бизнес “онлайн” бизнеһи кытта тэҥнэһэр кыаҕа суох. Дьокуускайга номнуо маннык хампаанньалар бааллар. Кинилэр мөлүйүөнүнэн дохуоттаахтар. Аныгы үйэҕэ эн ханна олороруҥ улахан оруолу оонньообот, эн тугунан дьарыктанарыҥ ордук суолталаах”, — диэн СӨ Инновация миниистирэ Анатолий Семенов иһитиннэрэр.
Кини этэринэн Нам улууһугар оптоволокно түөрт нэһилиэккэ киирэрэ хаалбыт. Онон улууска түргэн интэриниэт тарҕаннаҕына дистанционнай үөрэхтээһин, мэдэссиинэ уо.д.а. сайдар кыахтаах.
