Аһыы утаҕы атыылыыр көҥүллээх “туочукалар” ахсаана 842 буолбут. Бу 2017 сылга тэҥнээтэххэ 5,3% үрдүк. Ону таһынан, атыылыыр көҥүллээх урбаанньыттар ахсаана 4,6% үрдээбит.
2016-2017 сылларга аһыы утаҕы атыылыыр көҥүллээх маҕаһыыннар ахсаана биллэ аччыы сылдьыбыт. Ол курдук, 2016 с – 24% онтон 2017 с – 7,3%. Бу туһунан СӨ Урбааҥҥа, атыыга-эргиэҥҥэ уонна туризмҥа миниистир бастакы солбуйааччыта Ирина Гаргач, аһыы утаҕынан эргиниини сокуонунан бэрээдэктээһин туһунан төгүрүк остуолга иһитиннэрдэ.
Аһыы утах бары көрүҥүн иһии 1,3 төгүл үрдээбит. Холобур, пиибэ атыыта 1,5 төгүл улааппыт. Ол эрэн, олохтоох оҥорон таһаарар утахтарын атыыта 2017 сыллааҕар мөлтөх. Үрүҥ арыгы атыыта 2%, пиибэ – 3%, ликер – 6% түспүт. Ааспыт сыллаахха өрөспүүбүлүкэ олохтоохторо 341 л (38 мөл 375 тыһ) аһыы утаҕы испиттэр. Олортон 19 л (2 мөл 545 тыһ) олохтоох бородууксуйа.
