Нам олохтооҕо, биллиилээх оҕуруотчут, «Сибэкки сиккиэрэ» кинигэ ааптара Евдокия Степановна Гаврильева – Сибэкки Дуунньа Ньурба оҕуруотчуттарын кытары көрүстэ. Кини Бүлүү бөлөх улуустарынан сылдьан, оҕуруот аһын, сибэккини, винограды хайдах үүннэриигэ анаан семинар ыытта.
Ньурба улууһун култуура Департаменын быыстапка саалатыгар Евдокия Степановна Гаврильеваны кытта көрсүһүүгэ элбэх киһи сырытта. Кини ыарахан ыарыыны тулуурдаахтык тулуһарыгар сибэкки быыһаабытын кэпсээтэ. Дьон-сэргэ Сибэкки Дуунньа диэн аатынан билэр буолбуттар.
Евдокия Степановна баҕа санаатын толорон, кэргэнэ кыһыҥҥы теплица тутан, дьиэ, кыһыҥҥы сибэккилэри, клубникалары, винограды тиийэ үүннэрэллэр. Кини сибэккилэри, оҕуруот аһын арааһын үүнэриигэ бэйэтин хас эмэ сыллааҕы уопутун дьоҥҥо тарҕатар үтүө үгэстээх.
«Биисинэс-инкубатор» генеральнай дириэктэрэ Нюргуяна Михайловна Михайлова, Ньурба биллиилээх оҕуруотчута Агафья Афанасьевна Тарасова көрсүһүүнү тэрийдилэр. Евдокия Степановнаны кытары көрсөн, сүбэлэрин истэн, ньурбалар астыннылар. «Ньурба дьонугар-сэргитигэр ситиһиилэри баҕарабын. Кэнчээри ыччаккыт үөрэхтээх, чөл туруктаах, үлэһит дьон буоллуннар!» – диэн Сибэкки Дуунньа алгыс тылын тиэртэ.
Олоххо тардыһыылаах, дьоҥҥо-сэргэҕэ туһалаах сүбэлэри тарҕатар Евдокия Степановнаҕа ньурбалар махталларын биллэрэн сибэкки дьөрбөтүн, Ньурба туһунан өйдөбүнньүк халандаары туттардылар.
Антонина СЕМЕНОВА, ulusmedia
