Бүгүн Дьокуускайга Аҕа күнүгэр анаммыт үөрүүлээх мунньах буолла. Тэрээһиҥҥэ 25 оройуонтан 200 уопсастыбанньык кыттыыны ылла.
СӨ Бырабыыталыстыбатын бэрэссэдээтэлин солбуйааччы Ольга Балабкина эҕэрдэ тылын эттэ: “Хас биир киһи олоҕор аҕа сүҥкэн оруоллаах. Кини оҕо ис кыаҕын, хараактарын олоҕурдар, дьылҕалыыр киһи буолар. Эһигини бу кэрэ бырааһынньыгынан эҕэрдэлиибин”.
Аҕалар лигаларын бэрэссэдээтэлэ Айхал Габышев Аҕалар күннэрин уонна өрөспүүбүлүкэ үрдүнэн аҕалар 500 сэбиэтин холбуур уопсастыбаннай түмсүү устуоруйатын туһунан кэпсээтэ: “Биһиги түмсүүбүт сүрүн хайысхаларынан дьиэ кэргэн үнсүтүүтүн бөҕөргөтүү, дьэ кэргэн сыаннаһын, чөл олоҕу, аҕа буолар эппиэтинэһин тарҕатыы, байыаннай- патриотическай иитии, ыарахаҥҥа түбэспит дьиэ кэргэҥҥэ көмөлөһүү буолар. Биһиги, аҕалар бэйэбит холобурбутунан оҕолорбут төрөөбүт дойдуларын, ийэлэрин таптыыр, саастаах көлүөнэҕэ ытыктабыллаах буолалларыгар иитэн таһаарыахтаахпыт. Бигэ дьиэ кэргэн олоҕо – аҕа, оттон дьиэ кэргэн бигэ судаарыстыба акылаата буолар”.
Көхтөөх үлэһит аҕаларга судаарыстыбаннай наҕараадалары туттардылар. Ол курдук, “Бочуоттаах аҕа” бэлиэнэн Аҕа дойду сэриитин кыттыылааҕа, биэс оҕо аҕата Афанасий Николаев уонна үлэ бэтэрээнэ, 10 оҕо амарах аҕата Алексей Кондаков наҕараадаланнылар.
“Аҕа статуһун үрдэтиигэ уонна дьиэ кэргэн үнсүтүүтүн бөҕөргөтүүгэ кылаатын иһин” мэтээли профессор уонна академик Карл Башарин, “Союзлифтмонтаж” тэрилтэ генеральнай дириэктэрэ Игорь Чепкасов, Саха гимназиятын учуутала, педагогическай үлэ бэтэрээнэ Егор Жерготов, уопсастыбанньык Петр Чупров, “Емеян” тэрилтэ генеральнай дириэктэрэ, саха эр киһитигэр анаммыт пааматынньык ааптара Ян Емельянов туттулар. Бу туһунан бырабыыталыстыба пресс-сулууспата иһитиннэрэр.
