Саха сиригэр искэн ыарыылары сэрэтэр, эрдэттэн булан эмтиир сыаллаах “Онкопоиск” диэн скрининг аахсыйата биллэрилиннэ. Муус устар 13 күнүттэн ыам ыйын 13 күнүгэр диэри хас биирдии Саха сирин олохтооҕо буор-босхо онкомаркер анаалыстарын туттарыан сөп диэн СӨ Доруобуйа харыстабылын министиэристибэтин пресс-сулууспата иһитиннэрэр.
Аахсыйаны доруобуйа харыстабылын министиэристибэтэ уонна Дьокуускайдааҕы онкология диспансера кыттыһан ыыталлар.
СӨ Доруобуйа харыстабылын минисстирэ Елена Борисова:
— Бу аахсыйа сүрүн сыала – искэн ыарыылары эрдэттэн булуу. Аахсыйаҕа өрөспүүбүлүкэтээҕи онкология диспансера уонна бастакы үктэл тэрилтэлэрэ – улуустааҕы балыыһалар уонна поликлиникалар эмиэ кыттыһаллар. 18 сааһын туолбут Саха сирин хас биирдии олохтооҕо буор-босхо онкомаркер анаалыстарын туттарыан сөп.
Аахсыйаны Ил Дархан Айсен Николаев уонна кини кэргэнэ Людмила Николаева муус утар 13 күнүгэр хааннарын анаалыска туттаран саҕалаабыттара. Ил Дархан бэйэтин тус холобурунан скрининг чинчийиитин ааһалларыгар ыҥырда. Бу аахсыйа “Доруобуйа харыстабыла” национальнай бырайыак биир сүрүн хайысхатын – “Искэн ыарыылары утары охсуһуу” иитинэн ыытыллар.
Аахсыйаҕа хайдах кыттабыт?
Онкомаркер анаалыстарыгар хааны туттарарга бэйэҕит пааспаргытын, мэдэссиинэ полиһын, СНИЛС илдьэ кэлэҕит. Саха сирин олохтоохторо олорор сиргитинэн поликлиникаларга, улуустааҕы балыыһаларга тиийэҕит. Оттон киин куорат олохтоохторо сыһыарыллыбыт поликлиникаларыттан ураты онкология диспансерыгар эмиэ туттарыахтарын сөп (Стадухин уул.,81, 1-кы куорпус). Анаалыстары аччык искэ хас үлэ күнүн ахсын сарсыарда 9-11 ч. туттараҕыт.
