Чэпчэтиилээх сурутууну куоттарымаҥ!

Почта бары салааларыгар чэпчэтиилээх сурутуу декадата саҕаланна.

Муус устар 15 күнүгэр «Сурутааччы күнэ» үгэс буолбут декада үөрүүлээх аһыллыыта Дьокуускай куорат сүрүн почтатыгар буолла. Манна «Ситим» медиа-бөлөх, «Сахабэчээт» автономнай тэрилтэ уонна «Кэскил» кыһа кытыннылар.

Ааҕааччылар бу эрэ күннэргэ «Чолбон», «Полярная Звезда», «Күрүлгэн», «Байдам», «Хатан», «Илкэн», «Далбар Хотун», «Чуораанчык», «Колокольчик» сурунаалларга, «Бэлэм буол+», «Кыым», «Забота-Арчы», «Кэскил», «Юность Севера» хаһыаттарга чэпчэтиилээх сыананан суруталлара барыстаах буолуо.

Ону таһынан, сылын аайы ыытыллар «Дерево добра» аахсыйа чэрчитинэн ким баҕалаах социальнай тэрилтэлэргэ анаан хаһыаттары, сурунааллары сурутуохтарын сөп. Бүгүн бу аахсыйаҕа “Ситим” таһаарыыларыгар эмиэ суруттулар. Ол курдук, фитнес-тренер Ариадна Винокурова “Хатан” ыччат сайдам сурунаалыгар “Берегиня” оҕо дьиэтигэр сурутууну бэлэхтээтэ. Оттон  СӨ Физкултуура уонна успуорт туйгуна, “Өрөспүүбүлүкэтээҕи адаптивнай физкултуура уонна успуорт киинин” ыстаарсай тириэньэрэ Василий Оленов “Хатаны” адаптивнай оскуола-интэринээккэ сурутан биэрдэ. “Көмүлүөк” саха иһитин оҥорор тэрилтэ “Бэлэм буол+” оҕо хаһыатыгар оҕо онкогематология салаатыгар уонна “Берегиня” оҕо дьиэтигэр туттарда. Сунтаар улууһун Бүлүүчээннээҕи тэхэньиичэскэй лиссиэй-интэринээтигэр поэтесса, ырыаһыт Раиса Чирикова “Күрүлгэн” литературнай сурунаалы сурутан бэлэх уунна. “Күрүлгэн” бас дьаһабыла Афанасий Гуринов – Арчылан Тойбохой оскуолатыгар босхо сурутууну анаата. “Байдам” тыа сирин урбаанньыттарыгар аналлаах сурунаалы урбаанньыт, "Блинница" маҕаһыын хаһаайына Н. Попов  кырдьаҕас киһиэхэ сурутан бэлэх уунна. Бу дьон үтүө холобурдарыгар кыттыһан,  кыаммат ыалларга, элбэх оҕолоохторго, үөрэммит кыһаларгытыгар уо.д.а. сурутууну бэлэх уунуоххутун сөп.

Күндү ааҕааччылар! Эһиги сөбүлээн ааҕар сурунаалларгытын, хаһыаттаргытын муус устар 18 күнүгэр диэри чэпчэтиилээх сыананан суруйтараргытын куоттарымаҥ!