Киир

Киир

Саха сирин арҕааҥҥы бөдөҥ оройуоннарыгар – Мииринэйгэ уонна Ленскэйгэ холбоон-илбээн 100-чэ тыh киhи олорор. Өрөспүүбүлүкэҕэ үрдүк суолталаах промышленнай оройуоннар суоллара-иистэрэ ыарахан. Билигин үөһэнэн сырыы эрэ баар.   Мииринэйтэн Дьокуускайга көтөр сыана сиэрэ суох ыарахан 19 000 солк тиийэр.

Бу маннык сыаналаах көтөр аалы “АЛРОСА-Авиа” хампаанньа көтүтэр. Манна тэҥнээн көрдөххө, Ленскэйтэн Дьокуускайга көтөр “Якутия” уонна “ИрАэро” хампаанньалар сыаналара киһи сөҕүөх чэпчэкилэр. Мииринэй олохтоохторо Ленскэй куоратыгар таксыынан, түбэһиэх тыраанспарынан айаннатан тиийэн көтөр идэлэннилэр. Дьокуускайдыахпыт этэ диэн 240 биэрэстэлээх сиргэ айанныыллар. Ленскэйтэн Иркутскай хампаанньата “ИрАэро” 7 000 солк эрэ Дьокуускайга тириэрдэр. Мииринэйгэ хаһан итинник далбар буоларыгар итэҕэйиэх санаам кэлбэт.

“Сахабыт сирин киинигэр сөмөлүөтүнэн айан сыанатын туох ааттаах ыараттыгыт?” диэтэхпинэ, үрдүк таһымнаах мунньахтарга ончу көлбөрүтүнэн кэбиһээччилэр. Чунуобунньуктар эппиэттэрэ халбархай буолааччы. “Авиа-бөрөбүөсчүк манна хаһаайын, кини билэр” диэн буолар. Оттон салгын суолун ааҕыныстыбатын каассаларын үлэhиттэрэ туомугар быһаара сатаатах буолаллар. “Дьокуускайга авибилет 15000-19000 солк тиийэ сыаналаах, бэл оннооҕор Удачнайга 13000 солк” – диэн алы гыннах буолаллар. Урут ааҕыныстыбаҕа ыйытыккар сүгүн эппиэттээбэккэ иэдэс биэрэ олорор дьаллыктаахтара. Билигин сыһыан син уларыйбыт эбит.

Саха сирин киин куоратыгар диэри салгынынан айан ороскуота 19000 солк оттон Мииринэйтэн ким да долгуйбута көстүбэт. Дьэ, сүрдээх кэнэммит, бүтэйбит. Бэл, Мииринэйтэн Иркутскай куоракка диэри айанныылларыгар 12 000 солк төлүүллэр. Сибиир куораттарыгар айанныыр 55 саастан   биэнсийэлээхтэр, инбэлииттэр(1,2 категория), 23 саастарын туола илик ыччат 7000 солк төлүүллэр. Аны билигин Краснодарга, Симферопольга диэри чэпчэтиилээх билиэттэр баар буоллулар. “Якутия” хампаанньа Мииринэйтэн Хабаровскайга диэри хас бэнидиэнньик аайы көтөр. Билиэт сыаната 8000 солк. Оттон Дьокуускайга көтөргө сотору 25000 солк да төлүүр буоллахпытына, ким да тугу да саҥарбата буолуо диэн сылыктыыбын.

Станислав Алексеев, Мииринэй к., Слава Gelio СтепановАЛРОСА-Авиа саайтын хаартыскалара.

Тарҕат:

Санааҕын суруй

Бүтэһик сонуннар