Аммаҕа гражданскай сэрии дьоруойа САССР экспедиционнай этэрээтин комиссара Сергей Юльевич Широких – Полянскай сырдык тыына быстыбыт Хоҥхоойуку үрэҕин Туора Тумулугар бэлиэ күн буолан ааста. Гражданскай сэрии устуоруйатын музейын, оҕо бибилэтиэкэтин үлэһиттэрэ, оскуола оҕолоро Дьокуускайдыыр трасса 50-с километрыгар баар мэҥэ таас тулатын ыраастаатылар. Амма тыйаатырын артыыстара ааспыт кэм сылларын хартыынатын субу баардыы оонньоон көрдөрдүлэр.
24 саастаах эдэр комиссар 1922 сыллаахха ыам ыйын 7 күнүгэр бааһыран өлөрүллүбүт сиригэр Хоҥхоойуку үрэҕин Туора Тумулугар Амма оскуолатын үөрэнээччилэригэр умнуллубат бэлиэ күн буолан ааста. Гражданскай сэрии дьоруойун чиэстиир айылҕаны уонна төрөөбүт дойдуну таптыырга туһуламмыт маннык акция 2012 сылтан ыытыллар. Быйылгы тэрээһин уратыта диэн Саха Өрөспүүбүлүкэтэ сотору кэминэн 100 сыла туолуутугар бэлэмнэниигэ уонна тыйаатыр сылыгар ананна. Амматааҕы музей үлэһиттэрэ Василий Васильев уонна Людмила Васильева оҕолорго ааспыт сыллар уоттаах сылларын туһунан кэпсээтилэр. Оттон Евгений Николаев режиссердаах Амматааҕы народнай тыйаатырын артыыстара оҕолорго сэрии хартыынатын музыканан, тыаһынан-ууһунан, саа тыаһынан доҕуһуоллатан илэ чахчы оонньоон көрдөрдүлэр.
Гражданскай сэрии дьоруойдарын Широких – Полянскайы Федор Куличкин, Строду Игорь Быстров, саханы Артур Захаров уонна да атыттар оонньоотулар. Литературнай композицияны иккис оскуола үөрэнээччилэрэ Лариса Винокурова салайыытынан көрдөрдүлэр. Бастакы оскуола оҕолорун Фатима Орестова илдьэ сырытта. Кыттааччылар гражданскай сэрии дьоруойун мэҥэ тааһын тулатын ыраастаатылар. Оҕолорго умнуллубат айаны тэрийиигэ транспорынан, бензининэн 2 №-дээх оскуола, Ф.Ф. Потапов аатынан култуура киинэ, “Ситим” норуот айымньытын киинэ, улуустааҕы оҕо бибилэтиэкэтэ, “Махтал” маҕаһыын күүс, көмө буоллулар.
Алтана Артемьева, ulus.media
