Бүгүн өрөспүүбүлүкэҕэ биир бастакынан ыһыы үлэтэ Ньурбаҕа саҕаланна. Сүлэ нэһилиэгэр “Сиибиктэ” бааһынай хаһаайыстыба хаһааҥҥытааҕар да эрдэ киирэн, өҥ буорга маҥнайгы сиэмэ бурдугу түһэрдэ. Бааһынаҕа кыамталаах саҥа тиэхиньикэни боруобалаан биһирээтилэр.
Ньурба улууһун биир бөдөҥ “Сиибиктэ” бааһынай хаһаайыстыбата Кыра Атах диэн бааһынатыгар киирдэ. “Ньурбатааҕы сүөһү аһылыгын хампаанньата” тэрилтэ “Агратор-3400М” прицептээх тиэхиньикэтин уларсан, бааһынаҕа бастакы ыһыы сиэмэтин түһэрдилэр. Тэрилтэ үлэһиттэрэ Демьян Бадаев уонна Альберт Владимиров үлэлии сылдьаллар. “Сиибиктэ” хаһаайыстыба үлэһитэ Степан Иванов кэпсииринэн, улуус салалтата өйөөн, былырыын комбайн ылан сиилэс түргэнник хомуллубута.
“Быйыл саҥа тиэхиньикэ ылыллан, аныгы технологияҕа киирдибит. “Агратор” бааһына буорун хайытан онно сиэмэ бурдугу түһэрэр, онтон боронолуур уонна көлүөһэлэринэн диискэлиир. Инньэ гынан 3 үлэни тэҥҥэ оҥорор, чааска 3,4 га кыамталаах. Былырыын маннык сэбиргэли Сунтаар Кириэстээҕэр аҕалан туттубуттара, хайгыыллар этэ. Быйылгыттан 3 улахан хаһаайыстыба кыттыһан, сирбит үлэтин көмөлүү сылдьабыт. Бааһынай хаһаайыстыбаҕа 3 бааһынанан 70 гааҕа ыһар былааннаахпыт. Бааһынабытын боробулуоха күрүөнэн эргиттибит. Урут ыһыах саҕана ыстахпытына, ходуһа аһыллыбытын кэннэ ситэр буолан, сүөһү-сылгы тэпсээччи. Быйыл оту кытта тэҥҥэ ситиэхтээх” – диир кини.
“129 сүөһүнү кыстатан таһаардыбыт, ол иһигэр ынаҕа – 100-чэкэ. 300 кэриҥэ туоннаны ыларбыт буоллар диэн суоттанабыт. Бу кэнниттэн “Ньурба-Агро” МТС-ка уонна “Күндээдэ” хаһаайыстыбаҕа баран үлэлиэхтээх. Күн-дьыл үчүгэйдик туран биэрдэҕинэ, өлгөм сиилэһи ыллахпытына, үүппүт да элбиирин ситиһиэхпит. Хоту сир луговодствотын институтун үлэһиттэрэ кэлиэхтээхтэр, сүбэ-ама буолуохтара”, – кэпсээтэ Степан Иванов.
Геннадий Антонов, ulusmedia
