Майаҕа онкология ыарыытыгар амбулаторнай көмөнү оҥорор киин үөрүүлээх аһыллыыта буолла. Дойду үрдүнэн кэнники сылларга искэн ыарыыта тэнийбитинэн национальнай бырайыак чэрчитинэн үлэ-хамнас киэҥ далааһыннаахтык ыытыллар.
Мэҥэ-Хаҥаласка уопуттаах, киэҥ билиилээх онколог быраас Инна Захарова үлэлиир. Кини кэпсииринэн, өскөтүн ыарыһах искэн ыарыылаах буолуон сөптөөҕүн быһаартарар сыалтан Дьокуускай куоракка ыытан кэлбиттэр. Билигин диагностиканы, эмтэниини оройуоннааҕы киин балыыһа иһинэн аһыллыбыт кииҥҥэ көрөр-истэр буоллубут диэн үөрүүтүн үллэһиннэ. Улууска күн-бүгүн 326 киһи учуокка турар, 25 ыарыһах химиотерапия эмтэниитин ылар. Күнүһүн кэлэн эмтэнэр икки куойка-миэстэлээх кииҥҥэ эбии эмчит ыстаата, босхо эминэн-томунан хааччыйыы оҥоһуллуоҕа, аныгы ирдэбилгэ эппиэттиир аппарааттар туруоруллуохтара.
Үөрүүлээх түгэнинэн улуус баһылыгын социальнай боппуруостарга солбуйааччы Николай Цыпандин эҕэрдэлээтэ. Саҥа киин куһаҕан ыарыыны эрдэтинэ булар, сэрэтии үлэтин ыытар көдьүүстээх түмүктэрдээх буоллун, искэн ыарыылаахтар ахсааннара аҕыйыы турдун диэн баҕа санаатын тиэртэ. Улуус кылаабынай бырааһа Алексей Павлов саҥа кэрдиис кэмҥэ үктэннибит, онон биһиэхэ ирдэбил улаатта диэн биир идэлээхтэригэр туһаайан эттэ.
СӨ Доруобуйа харыстабылын миниистирин солбуйааччы Егор Прокопьев уонна өрөспүүбүлүкэтээҕи онкология диспансерын кылаабынай бырааһын солбуйааччы Валентина Сметанина ыҥырыылаах ыалдьытынан буоллулар. Өрөспүүбүлүкэҕэ бу ыарыыны утары охсуһарга үгүөрү үбүлээһин көрүллэрин, улахан болҕомто уурулларын эттилэр. Саас, күһүн өрүс суола хаайтарыыта, Дьокуускайга киирэн көрдөрүүгэ үп-харчы ороскуоттанара тыа сирин дьонугар уустуктардаах буоларынан, Илин эҥэр олохтоохторун көрөр киин аһыллыбыта туохтааҕар даҕаны табыгастааҕын бэлиэтээтилэр. Эмчиттэргэ көдьүүстээх үлэни, ыарыһахтар этэҥҥэ үтүөрэн доруобай буолалларыгар баҕа санааларын анаатылар.
2019 сылга өрөспүүбүлүкэ үрдүнэн онкология ыарыытыгар амбулатория көмөтүн оҥорор 9 киин аһыллара былааннанар. Дьокуускайга 4 балыыһаҕа, Мииринэйгэ, Нерюнгригэ, Алдаҥҥа, Ньурбаҕа уонна Мэҥэ Хаҥаласка биир бастакынан аһылынна.
Виктория БЕЛОЛЮБСКАЯ, ulus.media
