Ил Дархан Айсен Николаев сорудаҕынан өрөспүүбүлүкэ бырабыыталыстыбата Иркутскай уобалаһыгар айылҕа быһылааныттан эмсэҕэлээбиттэргэ 1 мөл солк ыытыа.
Тустаах дьаһалга премьер-миниистир Владимир Солодов илии баттаата. Бу туһунан Ил Дархан уонна Бырабыыталыстыба пресс-сулууспата иһитиннэрэр.
“Иркутскай уобалаһыгар айылҕа быһылааныттан тахсыбыт алдьархайтан туора туран хаалыа суохтаахпыт. Ол иһин, өрөспүүбүлүкэ бырабыыталыстыбата эмсэҕэлээбит дьоҥҥо 1 мөл солк көмө оҥорор туһунан быһаарыныыны ылынна. Ону таһынан, бу күннэргэ баҕалаах дьон эмиэ кыра да буоллар кылааттарын киллэрэллэригэр харчы хомуйуутун тэрийиэхпит”, – диэн премьер-миниистир кэпсиир.
Санатар буоллахха, Иркутскай уобалаһыгар күүстээх ардах түһэн өрүстэр уулара хааларыттан тахсан, хас да нэһилиэнньэлээх пууннар, 6,7 тыһ олорор дьиэлэр, массыына суола ууга бардылар. 2,6 тыһ киһи эвакуацияланна.
