Оҕону реабилитациялыыр өрөспүүбүлүкэтээҕи киин кулун тутар 12 күнүттэр толору үлэлиэ диэн, СӨ Үлэҕэ уонна социальнай сайдыыга министиэристибэтэ суруйар.
“Официальнай арыллыыта кулун тутар 12 күнүгэр буолар диэн эрээри, киин номнуо үлэлии турар. Чөлүгэр түһэрэр киин тутулларын өр күүппүппүт. Кини сүрүн соруга – оҕоҕо-төрөппүккэ үрдүк таһымнаах, табыгастаах чөлүгэр түһэрэр өҥөнү оҥоруу”, -диэн миниистир А.Михееев үллэстэр.
Миниистир этэринэн, киин толору кыаҕынан үлэлээн киирэн бардаҕына, биир сыл иһигэр 3 тыһыынчаттан тахса инбэлиит уонна доруобуйатыгар хааччахтаах оҕону сырытыннаран, чөлүгэр түһэриэхтээх. Онон өрөспүүбүлүкэни барытын хааччыйыахтаах.
“Бүгүҥҥү туругунан өрөспүүбүлүкэ үрдүнэн 6 тыһыынчаттан тахса инбэлиит оҕо баар. Биһиги кинилэри барыларын хабар былааннаахпыт. Аны туран, киин аҥаардас чөлүгэр түһэрэр эрэ буолбакка, ырай-кэрдэр, сүбэлиир-амалыыр уонна мэтэдиичэскэй киин буолуохтаах”,- диир тойон Михеев.
