Атырдьах ыйын ортотуттан Ньурбаҕа элбэх оҕолоох ыаллар оҕолоро оптуобуһунан 5 солкуобайга айанныыр буолуохтара. Бэҕэһээ буолан ааспыт улуус Сүбэтин уочараттаах 9-с сиэссийэтигэр итинник быһаарыы ылылынна.
Ньурбатааҕы АТП-га дьону таһыыга тарыып бэлиитикэтин сүрүннээһиҥҥэ харчы көрүлүннэ. Сиэссийэҕэ бу уонна да атын боппуруостары дьүүллэстилэр. Улуус баһылыгын үпкэ, экэниэмикэҕэ, инвестицияларга уонна бырайыактары салайыыга солбуйааччыта Николай Бурнашев “АЛРОСА” АХ аахсыйаларын дивиденин суотуттан улууска киирэр үптэн быйыл барыахтаах үлэлэргэ уларытыылары киллэрии туһунан иһитиннэрдэ. Норуот хаһаайыстыбатын салааларынан ханнык үлэлэргэ төһө үп тыырыллыбытын сиһилии эридьиэстээтэ.
Биир сонун хайысханан Ньурбатааҕы АТП дьону таһыытыгар тарыып бэлиитикэтин сүрүннээһин быһыытынан 4 мөл. 999 тыһ. солк. субсидия көрүллүүтэ буолла. Улуус Сүбэтин дьокутааттарын уонна улуус салалтатын бу өйөбүллэрин түмүгэр атырдьах ыйын ортотуттан элбэх оҕолоох ыаллар оҕолоругар оптуобуска бырайыас сыаната 5 солк. буолуоҕа. Билигин транспортнай каарталарын боппуруоһугар Алмаасэргиэнбааны кытта үлэлэһэ сылдьаллар.
Марха өрүскэ Маалыкай-Дьаархан-Маалыкай маршрутунан салгын уйуктаах суудунанан дьону таһарга сыананы чэпчэтэргэ улуустан ирээттэһэн үбүлээһин бэрээдэгинэн 5,2 мөл. солк. көрүлүннэ. Эрдэ Минтранстан эмиэ манна анаан 3,6 мөл. солк. субсидия анаммыта.
2-с уонна 3-с боппуруостарынан улуустааҕы КИО бэрэсссэдээтэлин солбуйааччыта Анастасия Попова “Ньурба куорат” муниципальнай тэриллиигэ уонна “ОДьКХ” ГУП бас билиитигэр бэриллиэхтээх эбийиэктэр тустарынан иһитиннэрии оҥордо. Мэрияҕа айдааннаах Кузаков уул. 30 №-дээх дьиэтиттэн 3 кыбартыыра босхолонон бэриллэр. Элбэх кыбартыыралаах олорор дьиэ кыбартыыралара СӨ “2012-2016 сс. хаачыстыбалаах олорор дьиэнэн хааччыйыы” тосхолун “Социальнай аналлаах олорор дьиэ фондатын тутуу” хос бырагырааматын чэрчитинэн бэдэрээтчиттэн муниципальнай хантараагынан атыылаһыллыбыттара. Кыбартыыралар муниципальнай бас билии быһыытынан регистрацияламмыттара, итиэннэ служебнай олорор дьиэ быһыытынан көрүллэн идэтийбит олорор дьиэ фондатыгар киллэриллибиттэрэ. Ньурба оройуонун борокуратууратын федеральнай сокуону кэһиилэри туоратыы туһунан ыйыы суругунан, ити кыбартыыралар сокуоннайа суохтук маннык фондаҕа киллэриллэ сылдьыбыттарын быһыытынан идэтийбит олорор дьиэ фондатыттан таһаарыллыбыттара. Кыбартыыраларга олорооччулар суут уурааҕынан тахсан биэрбиттэрэ. Муниципальнай бас билиигэ бэриллибитин кэннэ, куорат дьаһалтата РФ Олорор дьиэ кодексатыгар сөп түбэһиннэрэн, олорор дьиэлэргэ наадыйааччылар быһыытынан учуокка турар дьоҥҥо кинилэр хаһан учуокка ылыллыбыттарынан көрөн уочарат быһыытынан социальнай наймылаһыы дуогабаларынан биэриэҕэ. Инникитин гражданнар кыбартыыраларын приватизациялыахтарын сөп.
“ОДьКХ” ГУП-ка Октябрьскай нэһилиэгин Лэппириэн микро-оройуонугар тутуллубут хочуолунай оборудованиетын кытта холбуу босхо төрүккэ олоҕуран ОДьКх ГУП Ньурбатааҕы филиалыгар бэриллэр. “ОДьКХ” ГУП ити эбийиэги ылан чэпчэтиилээх сыананан технологическай холбооһуну оҥорон, манна баар ыаллары кииннэммит сылааһынан хааччыйыахтаах. Дьокутааттар дьүүллэһэн баран ити боппуруостарынан сиэссийэ быһаарыытын бырайыагын куоластаан бигэргэттилэр.
Улуус Сүбэтин бэрэссэдээтэлэ Сергей Евсеев бу каникул иннинээҕи тиһэх сиэссийэ буоларын, аныгыскы сиэссийэ балаҕан ыйыгар ыытыллыаҕын, наада буоллаҕына хаһан баҕарар мустуохтарын сөбүн иһитиннэрдэ.
Таркаайы нэһилиэгиттэн дьокутаат Алексей Тихонов үүт харчытын үрдэтэргэ эттэ. Улуус баһылыга Алексей Иннокентьев дьокутааттарга үтүө түмүктээх үлэлэрин иһин махталын тиэртэ, үүт сыанатын үрдэтэргэ этиини өйүүрүн, кэлэр сыл бүддьүөтүн торумнааһын кэмигэр дьокутааттар итиннэ чопчу этиилэрин киллэрэллэригэр эттэ. Салгыы кини улуус кэнники үлэтиттэн уонна инники былааннарыттан иһитиннэрии оҥордо.
Геннадий Антонов, ulus.media/
