Ааспыт нэдиэлэҕэ “Алроса” хампаанньа үлэһиттэрэ элбэх оҕолоох уонна тиийиммэт-түгэммэт ыаллар оҕолоругар оскуолаҕа киирэллэригэр көмө аахсыйаны ыыттылар. Бу аахсыйаҕа бастакынан Айхаллааҕы ГОК эдэр үлэһиттэрэ кыттыһан Айхал кырачааннара оскуолаҕа киирэллэригэр дьоһун көмөнү оҥордулар.
“Айхаллааҕы ГОК иһинэн “Горячие сердца”диэн волонтердар бөлөхтөрө иккис сылын “Собери ребенка в школу” диэн аахсыйаны ыытабыт. Аҕыйах күн иһигэр үөрэнээччилэргэ аналлаах 20 тахса нобуору бэлэмнээтибит. Манна үөрэххэ туттуллар мал-сал барыта баар. Холобур, тэтэрээттэр, альбомнар, харандаастар, суумка уо.д.а. “Комсомольскай” карьер үлэһитэ, волонтер Роман Проскурин сайыннарар оонньуурдары, эти-хааны эрчийэр тренажердары бэлэхтээтэ. Быйыл биһиги аахсыйабытыгар Айхал бөһүөлэгин олохтоохторо эмиэ кыттыстылар”, – диэн бөлөх салайааччыта Ксения Маликова кэпсиир.
Бу аахсыйаҕа Бүлүүтээҕи ГРЭ уонна АЛРОСА “Якутнипроалмаз” институтун үлэһиттэрэ кыттыстылар. Кинилэр хас да элбэх оҕолоох ыалларга үөрэххэ туттуллар тээбириннэри хомуйан биэрдилэр. Бу сэмэй бэлэхтэри Мииринэй уонна Ньурба улууһун Дьиикимдэ нэһилиэгин ыаллара тутуохтара. Маннык курдук “Чороон добра” диэн социальнай бырайыакка Дьокуускайдааҕы алмааһы атыылыыр тэрилтэ үлэһиттэрэ кытыннылар.
“Биһиги исписэлиистэрбит олус аламаҕай, үтүө санаалаах дьон. Сылга хаста да үтүө санаа долбууругар ас-үөл, таҥас-сап, үөрэх тээбиринин хомуйабыт. Быйыл хомуйбут көмөбүтүн Хатаска ыыттыбыт. Онон олох ыарахаттарыгар түбэспит, көмөҕө наадыйар дьон үтүө санаа долбууруттан тугу баҕаралларын буор босхо ылыахтарын сөп”, – диэн Дьокуускайдааҕы алмааһы атыылыыр тэрилтэ ОМС бэрэссэдээтэлэ Карл Парняков кэпсиир.
Маннык сыл аайы АЛРОСА өрөспүүбүлүкэ оскуолаларыгар көмө оҥорор. Ол курдук, эргэ оскуолалары өрөмүөннүүр, саҥа миэбэл, тиэхиньикэ, үөрэх тээбиринин атыылаһар. Холобур, 2016 сыллаахха Ньурба улууһун үөрэх тэрилтэлэригэр 1 513 000 солк көрүллүбүтэ. Оттон 2017 сыллаахха Мииринэй оройуонун оскуолаларыгар уонна орто, үрдүк үөрэх кыһаларыгар 220 мөл солк тыырыллыбыта.
