Ил Дархан Айсен Николаев хоруупсуйаны утары бохсор үлэни сүрүннүүр хамыыһыйа мунньаҕын ыытта. Бу туһунан Ил Дархан уонна бырабыыталыстыба пресс-сулууспата иһитиннэрэр.
Айсен Николаев нэһилиэнньэ хоруупсуйаҕа үөрэнэн барыа, убаныа суохтааҕын тоһоҕолоото.
“Хоруупсуйаны утары бохсуу Национальнай былааныгар судаарыстыбаннай сулууспалаахтар уонна нэһилиэнньэ хоруупсуйаҕа сыстыбаттарын туһуттан сырдатар, үөрэтэр үлэ күүһүрүөхтээҕин мээнэҕэ туруорбатахтара”, - диэн Айсен Николаев этиитин пресс-сулууспа суруйар.
Эрэгийиэн баһылыга хоруупсуйаны утары үлэҕэ СМИ оруола улаханын бэлиэтээбит. СМИ гражданнар бэриги ылыыга, биэриигэ правовой култууралара үрдүүрүгэр ураты оруоллаахтарын тоһоҕолообут.
Ил Дархан иһинэн хоруупсуйаҕа уонна атын быраабы кэһиини профилактикалыыр управление салайааччытын басткы солбуйааччыта Туйаара Саввина мунньах кэмигэр сэттэ улууска 2600 киһини хабан ыытыллыбыт социологическай чинчийии түмүктэрин кытары билиһиннэрбит. Маннык чинчийии салгыы бу сыл сэтинньитигэр ыытыллыаҕа. Чинчийии дойду бырабыыталыстыбата саҥа бигэргэппит методикатынан ыытыллыаҕа. Онно “бытовой хоруупсуйа” диэн өйдөбүл киирэн биэрбит, маны таһынан былаас уорганнара уонна биисинэс субъектара алтыһыыларыгар “дьыалабыай хоруупсуйа” диэн өйдөбүл киирэн биэрбит.
Үөрэх миниистирэ Владимир Егоров эппитинэн, хоруупсуйаны утарыыга биир кэлим үлэ үөрэнээччилэри, педагогтары уонна төрөппүттэри кытары ыытыллар эбит. Онуоха уруоктарга анал күрэхтэр, куруһуоктар бараллар эбит.
Инновация миниистирэ Анатолий Семенов СМИгэ хоруупсуйаны бохсорго үлэни сырдатыы тиһигин быспакка ыытылларын таһынан, эбии социальнай ситимнэргэ сырдатар, өйдөтөр үлэ күүскэ барыахтааҕын эттэ.
